कोरियामा पहिलो पटक नेपालीलाई विशेष नागरिक सम्मान

दक्षिण कोरियाली न्याय मन्त्रालयले पहिलो पटक एक नेपालीलाई विशेष नागरिक सम्मान प्रदान गरेको छ । सल्ले अर्थात हिमालबाट आएको मान्छे नामले परिचित धावा छिरिङ तामाङलाई यो सम्मान प्रदान गरेको हो । तामाङ कोरियामा बौद्ध धर्म र बौद्ध शिक्षाको माध्यमबाट सामाजिक कार्य गर्दै आएका नेपाली भिक्षु हुन् । विहिबार एक कार्यक्रमको आयोजना गर्दे कोरियाली न्याय मन्त्रालयले अमेरिकी नागरिक डब्लूजे वन्टवर्थ र रोमनियाकी किस्टिना गेलसँगै उनलाई सम्मान गरेको हो ।
कोरियाको बौद्ध विश्व विद्यालय दोंग्गुक विश्व विद्यालयमा अध्ययन गरेका तामाङले नेपाली कामदारहरुका लागि बस्ने सेल्टर, विरामी पर्दा उपचारका साथै अन्य सहयोग गर्दै आएका छन् । कोरियाली विद्यार्थीका लागि समेत उनले नेपाली संस्कृति र संस्कारको बारेमा पढाउँदै आएका छन् ।
कोरियाको पुरानो संस्था नेपाल बौद्ध परिवारका अध्यक्ष रहेका उनी बुद्धको जन्मभुमी नेपाल भएको भन्दै कोरियाली समाजमा निरन्तर आवाज उठाउदै आएका छन् । कोरियाको बिशेष नागरिकता कोरियाली समाजमा बिशेष योगदान दिने बिदेशी दिइने उच्च सम्मान हो ।
‘दक्षिण कोरियामा बौद्धमार्गीहरु धेरै छन् । हामीले नेपालमा भगवान बुद्ध जन्मिएको हो भन्ने जानकारी गराउन सके पनि धेरै पर्यटक नेपाल जान सक्छन् । अहिले पनि यहाँ बुद्ध भारतमा जन्मिएको भनेर विस्वास गर्ने धेरै छन् । हामीले हाम्रो ठाउँबाट सकेको प्रचारप्रसार गर्नु पर्छ । यसले हाम्रो देश र समाजलाई फाइदा नै पुग्छ ।’ तामाङले भने । ‘म सधै आफ्नो ठाउँबाट सत्य कुरा भन्ने प्रयास गरि रहेको हुन्छु । मैले यहाँको गुम्बामा प्रवर्चन गर्दा पनि भगवान बुद्धको बारेमा भनि रहेको हुन्छु । नेपाल र नेपाली समाजको बारेमा भनि रहेको हुन्छु । हाम्रो ठाउँ हेर्न चाहने धेरै कोरियाली छन् । हामीले उनीहरुलाई सजिलै जान सक्ने व्यवस्था भने गर्नु पर्छ ।’ उनले थपे ।
तामाङले कोरियामा बौद्ध संस्कृति सिकाउन विभिन्न गुम्बाहरुमा गरिने ट्याम्पल स्टेको ब्यवस्थापन पनि गर्दै आएका छन् । सन् २००२ को विश्वकपको समयमा धेरै पर्यटक कोरिया आउँदा बौद्ध संस्कृति देखाउन टेम्पल स्टे सुरु गरिएको थियो । अहिले कोरिया धेरै गुम्बामा टेम्पल स्टे गर्न सकिन्छ ।
कोरियाली समाजमा उत्कृष्ट सामाजिक कार्य गरे बापत सन् २०१२ देखि एक जना विदेशीलाई यो सम्मान दिईने गरिएको छ । ‘सधै एक जनालाई मात्रै दिईदै आएको रहेछ । यो बर्ष धार्मिक क्षेत्रमा काम गर्ने तीन जनालाई सम्मान गरे । कोरियाली सरकारले मलाई मात्र होइन सिंगो नेपालीलाई पनि सम्झेको हो । कामको स्याबासी दिएको हो ।’ तामाङले भने । अहिलेसम्म १२ जनाले यो सम्मान पाएका छन् ।