कथाकार दिलिप वान्तवा राईको पुस्तक ‘ताल्चा’को विमोचन
दक्षिण कोरियाको व्यस्त दैनिकीमा पनि श्रृजनात्मक कार्य गर्ने युवाहरुको कमि छैन । चित्रकला, साहित्य र गायन क्षेत्रमा यहाँका युवाहरुले राम्रै गरि रहेका छन् । भोजपुरका कवि तथा कथाकार दिलिप वान्तावा राईले पनि आफ्नो व्यस्त दैनिकीबाट केही समय निकाल्दै कथाहरु लेखेका छन् । उनको कथासंग्रह ताल्चा आइतबार विमोचन भएको छ । पुस्तक विमोचन आदिवासी जनजाति साहित्यकार महासंघ दक्षिण कोरिया शाखाले भर्चुअल माध्यमबाट गरेको हो । कार्यक्रमलाई साहित्यकारहरु उपेन्द्र सुब्बा, बिना थिङ तामाङ र जनक कार्कीले सम्बाेधन गरेका थिए ।
विभिन्न क्षेत्रलाई समेटेर लेखिएको १० कथा कृतिमा समावेश छ । सशस्त्र द्वन्दकालीन समयको भोगाई र कोरियाली जीवनशैली पुस्तकका कथाहरुमा पढ्न सकिन्छ । विमोचन कार्यक्रममा बोल्दै कवि उपेन्द्र सुब्बाले सबै कथा राम्रो रहेको बताए । ‘कथा राम्रो छ । पात्रहरु लेख्दा एउटै जस्तो भएको देखिन्छ । केही वरपरको पात्र पनि राख्न सकेको भए झन राम्रो हुन्थ्यो ।’ उनले भने ।
कथाकार बिना थिङले तीन पुस्ता देखि भोग्दै आएको शोषणका कुरा कथामा मार्मिक ढंगले लेखिएकाे आफूलाई खुबै मन परेको बताईन । ‘हाम्रो नुवाकोट तिरकाे जस्तै शाेषण पुर्ब तिर पनि रहेछ । कथामा त्यसरी जनजीवनको कुरा आउँदा राम्रो लाग्याे ।’
पुस्तकको समाबेश भएका कथाका बारेमा जनक कार्कीले बाेलेका थिए । उनले ताल्चा कृति केही कमीकजोरी भए पनि कथा राम्रो रहेको बताएका थिए । राम्रै मात्र भन्याे भने त पैसा दिएकाे बाेल्न ल्याएकाे मान्छे भन्छन् । याे पुस्तकमा पनि केही कमजारी छन् । उनले ठट्याेली पारामा भने । पुस्तकमा भएका कतिपय वाक्य संरचनामा ध्यान दिनु पर्ने बताए ।
कथाकार बान्तवाले आफू अन्तरमूखी स्वभावको भएकोले लेखन आफ्नो मनका कुरा अभिब्यक्त गर्ने माध्यमका रुपमा रहेको बताए । उनले धेरै कथा जीवनभोगाईबाट आएको बताए ।
कार्यक्रमा सभापति समेत रहेका आदिवासी जनजाती साहित्यकार महासंघ दक्षिण कोरिया शाखाका अध्यक्ष पराजित पोमुले ‘ताल्चा’ कथासङ्ग्रहका कथाकार दिलिप बान्तवालाई बधाई दिए । विदेशमा बसेर काम सँगै साहित्य क्षेत्रमा लाग्नु गाह्रो भए पनि अति नै राम्रो कार्य रहेको बताए । झन्डै दुई घन्टा चलेको कार्यक्रमलाई कवि उत्तम खजुमले सञ्चालन थिए ।
