कोरियन भाषा परिक्षा ईपिएसको आवेदन फाराम र परिक्षा-२०२२ दुबै अनलाईन हुने
वैदेशिक रोजगार विभाग ई.पि.एस.कोरिया शाखा ग्वार्कोले यस वर्षको कोरियन भाषा परिक्षा ईपिएसको भाषा परिक्षाको आवेदन फाराम र भाषा परिक्षाको मिति तोकेको छ ।
१८ वर्ष पूरा भई ३९ वर्ष ननाघेका योग्य उम्मेदवारले चैत्र १४ देखि २१ गते (तदानुसार March 28-April 04, 2022) सम्ममा परिक्षा आवेदन दिन सकिने शाखाको आज जारी सूचना उल्लेख गरिएको छ । आवेदकले https://eoers.epsnepal.gov.np मार्फत आवेदन फाराम भर्न सकिने छ ।
ई.पि.एस.कोरिया शाखा ग्वार्कोले भाषा परिक्षा कृषि तथा पशुपालन क्षेत्रको परिक्षालार्ई पहिलो चरण २०७९ बैशाख २६ देखि जेठ १३ दोश्रो चरण जेठ १४ देखि अषाढ १६ गतेसम्म अनलाईनमार्फत परिक्षा सञ्चालन गर्ने भएको छ । साथै उत्पादनमुलक क्षेत्रको पहिलो चरण २०७९ आषाढ २० देखि भाद्र १० दोश्रो चरण भाद्र १६ देखि असोज २१ गतेसम्म परिक्षा हुनेछ । साथै एक दिनमा ४ सिफ्ट गरी परीक्षा संचालन हुने साथै आवेदक संख्याका आधार र अन्य विविध कारण आईपरेमा परीक्षा तालिका फेरबदल हुन सकिने समेत उल्लेख गरिएको छ ।
शाखाले यस वर्ष रोष्टरमा सूचीकृत गर्न अनुमानित उतीर्ण संख्या ९६५४ जना गरिएकोमा उत्पादन क्षेत्रतर्फ ६९१३ तथा कृषि तथा पशुपालन क्षेत्रतर्फ २७४१ कोटा निर्धारण गरेको छ ।
नेपाल सरकार , श्रम , रोजगार तथा सामाजिक सुरक्षा मन्त्रालय र गणतन्त्र कोरिया , रोजगार तथा श्रम मन्त्रालय बीच सम्पन्न समझदारी पत्र (MoU) अनुरुप रोजगार अनुमति प्रणाली (EPS) अन्तर्गत गणतन्त्र कोरियामा इच्छुक योग्य नेपाली नागरिकलाई कामदारका रुपमा पठाउदै आएकोमा विश्वभरको कोरोना महामारीले २ वर्ष यता भाषा परिक्षा गर्न सकिरहेको थिएन ।
