प्रधानमन्त्री देउवाद्वारा तेमाल गाउँपालिकाको प्रशासकीय भवन उद्घाटन
तेमाल गाउँपालिकाको नव निर्मित प्रशासकीय भवनको शनिवार (चैत्र ५ गते) प्रधानमन्त्री शेर बहादुर देउवाले समुद्धाटन गरेका छन् । समुद्घाटन पश्चातको औपचारिक कार्यक्रममा बोल्दै प्रधानमन्त्री तथा काङ्ग्रेस सभापति समेत रहेका देउवाले तेमाल गाउँपालिकामा धार्मिक र पर्यटकीय सम्भावना भएको भन्दै भकुण्डे–मेच्छे पौवा सडक, सुनकोसी खानेपानी लगायत स्थानीय आयोजनालाई सहयोग गर्न आफू प्रतिबद्ध रहेको बताए ।
उनले तेमाल गाउँपलिकाको कार्यसम्पदन उत्कृष्ट रहेको पाएको भन्दै नवनिर्मित प्रशासकीय भवनबाट जनतलाई दिने सेवा प्रभावकारी हुने विश्वास पनि व्यक्त गरेका थिए ।
कार्यक्रममा संविधान सभा सदस्य एवं नेपाली काँग्रेसका जिल्ला सभापति तीर्थ लामाले तेमाल गाउँपालिका पर्यटकीय तथा धार्मिक क्षेत्र समेत भएकाले यस क्षेत्रको विकासका लागि नेपाल सरकारको सहयोग खाँचो रहेको औँल्याए ।
भुकुण्डेबेशी देखि मेच्छेपौवा सम्मको सडक कालोपत्रेका लागि ४० करोडको बजेट परेको भन्दै थप ६० करोड अवाश्यक रहेको उनको भनाई रहेको थियो । साथै बृहत सुनकोशी खानेपानी सम्पन्न गर्न ५० करोड रकम अझैँ अपुग रहेको प्रधानमन्त्री देउवालाई लामाले जानकारी गराएका थिए ।
पूर्वराज्यमन्त्री तथा नेकपा (माओवादी केन्द्र) का जिल्ला इञ्चार्ज सूर्यमान दोङले स्थानीय निर्वाचनमा सरकारमा रहेका दलहरु बीच गठबन्धन आवश्यक रहेको बताएका थिए । र यो गठबन्धनलाई आगामी स्थानिय निर्वाचन र संसदीय निर्वाचन सम्म नै निरन्तरता दिन समेत प्रधानमन्त्री लाई आग्रह गरेका थिए ।
तेमाल गाउँपालिका अध्यक्ष सलाम सिं तामाङले गाउँपालिकाको समृद्धिका लागि कामको सुरुवात गरेको तर अझै धेरै काम गर्न बाँकी रहेको बताउँदै यसका लागि उनले प्रधानमन्त्री सँग नेपाल सरकारको सहयोग आवश्यक रहेको बताए । भकुण्डे–मेच्छेपौवा सडक, बोहोरेदोभान सडक कालोपत्रे गर्न, सरकारी अस्पताल निर्माण गर्न, कृषि तथा बाली विज्ञान पढाइ गर्न, वौद्ध विश्वविद्यालय, भ्यूटावर र तामाङ संग्रहालय निर्माण गर्न प्रधानमन्त्री सँग सहयोगको अपेक्षा गरेको तामाङले बताए । त्यस्तै तेमाल गाउँपालिकाका प्रवक्ता ज्ञानबहादुर तामाङले स्वागत मन्तव्यको क्रममा ४ करोड ६४ लाख आठ हजार ८६३ रुपियाँमा भवन निर्माण सम्पन्न भएको जानकारी दिएका थिए ।
२०७६ साउन ७ मा गाउँपालिकाले प्रशासकीय भवन निर्माणको काम साङदोर्जे निर्माण कम्पनीलाई दिएको थियो । उक्त भवन दुई बर्षको अवधिमा सम्पन्न भएको थियो । उक्त निर्माण कम्पनीकाे प्रोपाइटर छोइसाङ लामालाई प्रधानमन्त्री शेर बहादुर देउवाद्वारा सम्मान पत्र प्रधान गरिएको छ । 
