कोरियास्थित पाँच संघसंस्थाद्धारा नेपाली तेक्वान्दो खेलाडीहरु सम्मानित
दक्षिण कोरियामा आयोजना हुन गईरहेको विश्व अन्तर्राष्ट्रिय पुम्से तेक्वान्दो च्याम्पियनसिपका लागी कोरिया आएका राष्ट्रिय तेक्वान्दो खेलाडीहरु सम्मानित भएका छन् । गत शनिबार दोङ्देमुन सउलस्थित एभरेष्ट करी वर्ल्ड रेष्टुरेण्टमा कोरियामा स्थापित पाँच संघसंस्था एनआरएनए, चितवन सम्पर्क समिति, तमू धीं, किराँत याक्थुङ चुम्लुङ र अर्घाखाँची सम्पर्क मञ्चद्धारा सामूहिक स्वागत तथा सम्मान गरिएको हो ।
राष्ट्रिय खेलकुद परिषद प्रशिक्षक रोशन खानको नेतृत्वमा कोरिया प्रवेश गरेका १३औं साग खेलकुद २०१९ स्वर्ण पदक विजेताहरु पार्वती गुरुङ र कमल श्रेष्ठ, काँस्य पदक विजेता प्रेम बहादुर लिम्बु र राष्ट्रिय स्वर्ण पदक विजेता अब्बास अन्सारीको समूह कोरियाको गोयाङ शहरमा हुन गईरहेको विश्व अन्तर्राष्ट्रिय पुम्से तेक्वान्दो च्याम्पियनसिपमा नेपालको प्रतिनिधित्व गर्दै भाग लिने भएका हुन् ।
तमू धीं दक्षिण कोरियाका केन्द्रीय महासचिव सन्तोष गुरुङको स्वागत मन्तव्यसँगै शुरु भएको कार्यक्रममा प्रमुख आतिथ्यता एनआरएनए दक्षिण कोरियाका अध्यक्ष दीपक पुनले गरेका थिए । विशेष अतिथिहरुमा तमू धीं द. कोरियाका निवर्तमान अध्यक्ष जीत गुरुङ, किराँत याक्थुङ चुम्लुङ द. कोरियाका संरक्षक शमशेर लिम्बु र अर्घाखाँची सम्पर्क मञ्च द. कोरियाका अध्यक्ष विश्व खनाल लगायतले सम्पूर्ण खेलाडीहरु राष्ट्रकै गौरवसँग जोडिएको बताउँदै खेल जीवनको सफलताको शुभकामना सहित आ-आफ्नो धारणा व्यक्त गरेका थिए । चितवन सम्पर्क समिति दक्षिण कोरियाका अध्यक्ष राजकुमार स्याङ्तानको सभाध्यक्ष रहेको सो स्वागत तथा सम्मान कार्यक्रमको सञ्चालन सोही संस्थाका वरिष्ठ उपाध्यक्ष सागर सापकोटाले गरेका थिए ।
