कोरियाको किम्हेमा ख्यङ्साङ्नाम्दो कप फुटसल प्रतियोगिता आउँदो जून १९ तारिकमा हुने

कोरियाको दक्षिणी भेगमा रहेको तमू धीं ख्यङ्साङ्नाम्दो बुसान शाखाले आउँदो जून १९ तारिक ख्यङ्साङ्नाम्दो फूटसल प्रतियोगिता २०२२ आयोजना गर्ने भएको छ । कोरोनाको संक्रमणमा नियन्त्रण र स्थितिमा सहजता देखिएकोले खेलको मनोरञ्जनसँगै कोरियामा रहेका नेपालीहरु विचको आत्मियता, भाईचारा र बन्धुत्वको भावना अभिबृद्धि गर्ने उद्धेश्यले किम्हे सहरमा अवस्थित खेलमैदानमा उक्त प्रतियोगिता आयोजना गरिएको संस्थाका अध्यक्ष कर्ण गुरुङले बताए ।

प्रतियोगितामा विजेता र उपविजेता टिमले क्रमशः ३० लाख र १५ लाख कोरियन वोन सहित आकर्षक ट्रफी, मेडल र प्रमाण प्राप्त गर्नेछन् । दुई सेमिफाईनलिष्ट टिमलाई ३/३ लाख कोरियन वोन सहित प्रमाण पत्र प्रदान गरिनेछ भने खेल अवधिभरको उत्कृष्ट खेलाडी र गोलकिपरले नगद १/१ लाख कोरियन वोन सहित ट्रफी, मेडल प्रमाण पत्र प्राप्त गर्नेछन् । टिम दर्ता शुल्क ३ लाख कोरियन वोन कायम गरिएको छ भने यही मे २३ देखि जून १२ तारिकसम्म टिम दर्ता गर्न सकिने सोही संस्थाका खेल संयोजक फिलिप गुरुङले जानकारी दिए ।

कोरियामा रहेका तमू समुदायलाई एकताको सुत्रमा बाँध्दै आफ्नो जातीय भाषा, भेषभूषा, कला, संस्कृति र अस्तित्वको संरक्षण र सम्बर्द्धनमा टेवा पुर्याउँदै विभिन्न संघसंस्था र संगठनहरुसँग समन्वय र सहकार्य गर्दै आइरहेको तमू धीं ख्यङ्साङ्नाम्दो बुसान शाखाले आयोजना गरेको ख्यङ्साङ्नाम्दो कप फुटसल प्रतियोगिता २०२२ लाई सफल बनाउन कोरियामा रहनुहुने सम्पूर्ण खेलप्रेमीहरुमा सहयोगको अपिल गर्दै उपस्थितिको लागि आयोजकले अनुरोध गरेको छ ।