तमू धीं द. कोरियाको वार्षिक साधारण सभा मे २९ मा हुने
कोरिया स्थित जातीय संस्था तमू धीं केन्द्रीय कार्यसमितिको वार्षिक साधारण सभा यही मे महिनाको २९ तारिक हुने भएको छ । संस्थाको नवौं कार्यसमितिले वितेको एक वर्षको प्रगति, आर्थिक प्रतिवेदन प्रस्तुत गर्ने साथै संस्थागत समीक्षा सहित आगामी कार्ययोजना लगायतको विषयमा छलफल गर्ने उद्धेश्यले सउल दोङ्देमुन स्थित नेपाल थाई रेष्टुरेण्टको सभा हलमा दिनको १२ बजेदेखि उक्त साधारण सभा गर्ने भएको हो ।
सन् १९९९ मा स्थापना भएको तमू धीं दक्षिण कोरियाले विभिन्न संघ संस्थाहरुसँग सहकार्य र समन्वय गर्दै दुई दशकभन्दा लामो इतिहासको यात्रामा विविध अप्ठ्यारो परिस्थितिको सामना गर्दै आफ्नो जातीय भाषा, धर्म, रीतिरिवाज, अस्तित्व तथा पहिचानको संरक्षण र सम्बर्द्धनमा टेवा पुर्याउँदै आईरहेको संस्थाका केन्द्रीय अध्यक्ष लेसन गुरुङले बताए । विगत लामो समयदेखि सउल दोङ्देमुनमा सेल्टर समेत सञ्चालन गरेर सेवा दिईरहेको सन्दर्भ सोही संस्थाका महासचिव सन्तोष गुरुङले थपे ।
कोरियामा रहेको तमूहरुलाई एकताको मालामा उन्दै धेरै उदाहरणीय कार्यसहित सामाजिक सेवामा अग्रसर रहेको तमू धींले कोरियाभरी ख्यङ्साङ्नाम्दो बुसान शाखा, थेगु शाखा र जेजुदो शाखा गरि आफ्नो तीन शाखा विस्तार गरिसकेको संस्थाकी वरिष्ठ उपाध्यक्ष रुपा गुरुङले उल्लेख गरिन् । विगतका हरेक कार्यक्रम जस्तै यस साधारण सभालाई सफलतापूर्वक सम्पन्न गर्न सबै शाखाका अध्यक्ष, पदाधिकारीहरु एवं सदस्यहरु, संस्था सम्बद्ध सल्लाहकारहरु, विभागीय प्रमुखहरु, खेलाडीहरु, समस्त शुभचिन्तक, तमू दाजुभाई तथा दिदीबहिनीहरुलाई गरिमामय उपस्थितिको लागी आयोजकले अनुरोध गरेको छ ।
कार्यक्रम तपसिल :
मिति : २०२२ मे २९ तारिक आइतबार
समय : दिनको ठिक १२:०० बजेदेखि
स्थान : नेपाल थाई रेष्टुरेण्टको सभा हल, दोङ्देमुन सउल
