कोरियामा कबड्डी ४ प्रदर्शन हुने
पछिल्लो समय धेरै चर्चामा आएको रामबाबु गुरुङ निर्देशित सुपरहिट बहुप्रतिक्षित नेपाली कथानक चलचित्र कबड्डी ४ दि फाईनल म्याच दक्षिण कोरियामा छिट्टै प्रदर्शन हुने भएको छ । तमू धीं दक्षिण कोरियाले अबको केही हप्ता भित्रै उक्त चलचित्र प्रदर्शन गर्ने तयारीमा जुटेको हो ।
कोरोना कहरले विगत लामो समयदेखि थलिएको नेपाली चलचित्र उधोग तथा मनोरञ्जनात्मक क्षेत्र पनि प्रभावित भएको सन्दर्भसँगै अहिलेको स्थिति केही सहज भएकोले कोरियामा रहेका नेपाली जनसमुदाय विचको आपसी सद्भावको निरन्तरता साथै नेपाली चलचित्रलाई प्रोत्साहन दिने उद्धेश्यले चलचित्र प्रदर्शनको तयारीमा जुटेको तमू धीं दक्षिण कोरियाका केन्द्रीय अध्यक्ष लेसन गुरुङले बताए । कबड्डी ४ निर्माण पक्षसँग प्रदर्शनको लागी आधिकारिक सम्झौता भईसकेको र पहिलो शो सउल क्षेत्रमा गरिने त्यसपछि कोरियाको अन्य सहरमा प्रदर्शन गर्न अनुमति प्रदान गरिनेछ भने प्रदर्शनको लागी स्थान र मिति छिट्टै सार्वजनिक गरिने आयोजक संस्थाले जनाएको छ ।
उक्त चलचित्र सउल प्रदर्शन पश्चात आयोजकसँग आवश्यक सम्झौता र प्रक्रिया पूरा गरि अन्य ईच्छुक संस्थाहरुले तमू धीं दक्षिण कोरियालाई सम्पर्क गरी प्रदर्शनमा ल्याउन सक्नेछन् । चलचित्र हेरेर भरपूर मनोरञ्जन लिनुहुन कोरियास्थित सम्पूर्ण नेपाली दाजुभाई तथा दिदीबहिनीहरुमा आयोजकले हार्दिक अनुरोध गरेको छ ।