फरक
पसिना
बग्दै झर्छ पैताला तिर
उता हुँदा
अलिकति निधारमा
पसिना आउँदा पनि
थचक्क बसिन्थ्यो चौतारीमा
पुछिन्थ्यो झुम्के रुमालले
यता त झरिरहन्छ पसिना
म मेसिन,
काम गरि रहन्छु ।
गाउँमा
घाम आए पछि
ज्यानमा ज्यान आउँथ्यो
यहाँ घाम आए पछि
अलिकति बाँकी रहेको ज्यान पनि
मरेर जान्छ ।
घाम उही हो
हावा उस्तै हो ।
भञ्ज्याङ डाँडामा उक्लिए पछि
हावाको एक झोक्का
छोएर जान्थ्यो
सुमसुम्याउँदै मेरो जवानीलाई
कम्पनीमा फ्यान छन् ठूला ठूला
हावा फालिरहन्छ
हुत्याउँदै जान्छ ओराली
झर्दै गरेको जिन्दगीलाई ।
