स्याङ्जा परिवारले अगष्ट २० र २१ मा दुई दिने बनभोज कार्यक्रम आयोजना गर्ने
कोरिया स्थित स्याङ्जा परिवारले आउँदो अगष्ट २० र २१ तारिक दुई दिने रमाइलो बनभोज कार्यक्रम आयोजना गर्ने भएको छ । स्याङ्जा परिवार दक्षिण कोरियाले आफ्नो दुई शाखाहरु किम्हे/बुसान र थेगु शाखासँगको संयुक्त आयोजनामा सउल, बुसान र थेगु क्षत्रमा बीचको भागमा पायक पर्ने गरि (경북 성주군 대가면 옥성리 723) मा सो बनभोज कार्यक्रमको आयोजना गरेको हो ।
कोरियामा रहेर विभिन्न पेशा, व्यवसाय तथा रोजगारीको शिलशिलामा आबद्ध स्याङ्जाली दाजुभाई तथा दिदीबहिनीहरु विचको आत्मीयता र एकता अभिबृद्धि गर्ने अभिप्रायले उक्त बनभोज कार्यक्रम आयोजना गरिएको संस्थाको केन्द्रीय अध्यक्ष विजय थापाले जानकारी दिए ।
विभिन्न कालखण्डमा महत्वपूर्ण कार्यक्रमसँगै सामाजिक सेवाको भावनाले ओतप्रोत रहेर उल्लेखनीय योगदान पुर्याउँदै आइरहेको संस्थाले कोरोना महामारीको सङ्क्रमण र जोखिमको कारण विगत तीन बर्ष यता कुनै प्रत्यक्ष कार्यक्रम गर्न असमर्थ रहेपनि समयसापेक्षित जूम भर्चुअल मार्फत कार्यक्रम गर्दै संस्थालाई चलायमान गरिरहेको सन्दर्भ संस्थाका किम्हे/बुसान शाखाका अध्यक्ष कमल अर्यालले बताए । लामो समयपछि भेटघाटको अवसर जुटेको र कोरोना कहर सहज बन्दै गएकोले बनभोज मार्फत स्याङ्जालीहरुको आत्मीयता अझ बढ्ने विश्वास संस्थाका थेगु शाखा अध्यक्ष मित्र मगरले व्यक्त गरे ।
स्याङ्जा परिवारद्वारा आयोजित उक्त रमाइलो बनभोज कार्यक्रमका लागि सहभागी शुल्क स्वरुप पुरुषलाई १,००,००० र महिलाका लागी ८०,००० कोरियन वोन निर्धारण गरिएको छ । कार्यक्रममा उपस्थित भइ कार्यक्रम सफल बनाइदिनुहुन समस्त स्याङ्जाली महानुभावहरुमा आयोजक संस्थाले हार्दिक अपिल गर्दै जान इच्छुक व्यक्तित्वहरुले आफूलाई पायक पर्ने स्थानबाट सहभागी हुने गरी संस्थाका प्रतिनिधिहरुलाई सम्पर्क गरि यथासक्य छिटो नाम टिपाउनुहुन समेत अनुरोध गरेको छ ।
