तामाङ घेदुङको स्थापना दिवस तथा बार्षिक साधारण सभा सम्पन्न
नेपाल तामाङ घेदुङ दक्षिण कोरियाले आफ्नो स्थापना दिवस तथा वार्षिक साधारण सभा सम्पन्न गरेको छ । शुक्रबार भएको कार्यक्रममा दक्षिण कोरियामा रहेका तामाङहरू सहभागी भएका थिए ।
तामाङ भाषा, धर्म, संस्कार संस्कृतिको संरक्षण गरौं भन्ने नाराका सहित भएको कार्यक्रमलाई घेदुङ संघीय परिषदको सदस्य तथा कोरिया इन्चार्ज सोम तामाङले सम्बोधन गरेका थिए । उनले सङ्घीय घेदुङले काठमाडौंमा ग्रेन् घिम बनाउन लागेकोले सहयोग गर्न आग्रह गरे । ‘यो सबै तामाङको आस्था र हाम्रो आफ्नो भन्ने घर हो । त्यसैले सकेको सहयोग सबैले गर्नु पर्यो।’ कार्यक्रममा महासचिव शुभराज बोम्जनले संस्थाको प्रगति प्रतिवेदन प्रस्तुत गरेका थिए भने कोषाध्यक्ष सुरेश थोकरले आर्थिक प्रतिवेदन प्रस्तुत गरेका थिए ।
कार्यक्रमलाई निवर्तमान अध्यक्ष मेघप्रसाद वाइबा, पूर्व अध्यक्ष उइना सिंह वाइबा, तामाङ पत्रकार संघका अध्यक्ष आमिर योञ्जन, बाग्मती प्रदेश एकता समाजका अध्यक्ष रविप्रताप घिसिङ लगायतका वक्ताहरुले सम्बोधन गरेका थिए ।
घेदुङले आजीवन सदस्यता वितरण गरेर कल्याणकारी कोषको स्थापना गर्ने घेदुङका अध्यक्ष रवि योञ्जन तामाङले जानकारी दिए । ‘हामीले अब आजीवन सदस्यता वितरण गर्ने र एउटा कोषको स्थापना गर्ने योजना छ । यसलाई कोरियामा रहेका तामाङबाट सहयोग हुन्छ भन्ने आशा लिएको छु ।’ उनले भने ।
