सकियो माम्फ
विभिन्न मुलुकको कला, संस्कृति र भेषभूषालाई एकै स्थलमा प्रस्तुत गरिने कार्यक्रम माइग्रेन्ट आरिराङ मल्टिकल्चरल फेस्टिबल (माम्फ) आइतबार सकिएको छ । ख्याङनाम माइग्रेन्ट सेन्टर र माम्फ आयोजक कमिटिले आयोजना गरेको १७ औं माइग्रेन्ट आरिराङ मल्टिकल्चरल फेस्टिबल २०२२ मा नेपाल, चीन, जापान, म्यानमार, मंगोल, भियतनाम, थाइल्याण्ड, उजबेकिस्तान, पाकिस्तान, कम्बोडिया, फिलिपिन, श्रीलंका, बंगलादेश, इन्डोनेसिया र दक्षिण कोरिया गरी १५ मुलुकको सहभागिता रहेको थियो ।
छाङवन शहरको योङजी पार्कमा गत शुक्रबारदेखि आइतबारसम्म चलेको तीनदिने मल्टिकल्चरल फेस्टिबलमा हरेक मुलुकको विभिन्न प्रस्तुतीसहित बहुसांस्कृतिक विविधता परेड, एशियाली संगीत कन्सर्ट, ग्लोबल माइग्रेन्ट डान्सका साथै विभिन्न मुलुकलाई चिनाउने कला प्रदर्शनी र विविध सामग्रीसहितको स्टलहरु राखिएका थिए । प्रवासीहरुका लागि गरिने कोरियाकै सबैभन्दा ठुलो महोत्सवमा सहभागी राष्ट्रहरुका राजदूतसहित उच्च निकायका व्यक्तित्वहरुको समेत उपस्थिति रहेको छ । उक्त महोत्सवमा हरेक मुलुकबाट आएका चर्चित कलाकारहरुले आफ्नो प्रस्तुति पस्केका थिए भने नेपालबाट आएका चर्चित कलाकार धर्मेन्द्र सेवान र तृष्णा गुरुङले नेपाली सहित विभिन्न मुलुकका दर्शकहरुलाई आफ्नो गीतसंगीतमार्फत् मनोरञ्जन प्रदान गरका थिए । त्यसैगरी नेपालका चर्चित लोक तथा कथक नृत्यकार सीता सुवेदीले पनि नेपाली लोक गीतमा नृत्य पस्केकी थिइन् । ग्लोबल माइग्रेन्ट्स डान्स अडिसनमा नेपाली टिमबाट छानिएका कलाकार आरती चौधरी र सुबी मानन्धरले स्टेजमा नृत्य गरेका थिए । महोत्सवको अन्तिम दिन भएको बहुसांस्कृतिक विविधता परेडमा ३० लाख वनसहित मंगोलको समुह प्रथम भएको थियो । करिव २४ हजारको सहभागिता रहेको उक्त फेस्टिवल कोरोनाका कारण दुई वर्ष अनलाइन कार्यक्रम गरिएको थियो ।
तस्बिरहरु
