कोरियाको थेगुमा मनाईने तमू ल्होसारमा दि भ्वाइस अफ नेपाल ४ की प्रतियोगी पवित्र गुरुङ आउने

कोरियाको दक्षिणी भेग थेगु सहरमा तमू (गुरुङ) जातिको नयाँ वर्ष तथा मौलिक पर्व तमू ल्होसार आउँदो जनवरी १ तारिक मनाउने भएको छ । तमू धीं दक्षिण कोरिया थेगु शाखाको आयोजनामा हिमालय टेलिभिजन प्रशारण भईरहेको दि भ्वाइस अफ नेपाल सिजन ४ नकआउट राउण्ड सम्मको यात्रा तय गरेकी कलाकार पवित्र गुरुङको साथमा थेगु स्थित Maeil Garden (대구 광역시 중구 계산동 2가 71 본지 매일 신문사 11 층) हलमा सो ल्होसार मनाउने भएको हो ।

तमू समुदायको वर्ग चक्र अनुसार तो-ल्हो (बाघ वर्ग) लाई विदाई र ही-ल्हो (बिरालो वर्ग) लाई स्वागत गरी यस पटकको ल्होसारको अवसरमा दिवा भोज, शुभकामना आदानप्रदान तथा विविध साँस्कृतिक कार्यक्रम आयोजना गरिएको तमू धीं दक्षिण कोरिया थेगु शाखा अध्यक्ष गणेश गुरुङले जानकारी दिए । कोरोना कहरको कारण विगत दुई वर्ष यता प्रत्यक्ष कार्यक्रम गर्न असमर्थ रहेपनि अहिलेको जनजीवन सामान्य बन्दै गएको सन्दर्भमा नेपालबाट आमन्त्रित कलाकार पवित्र गुरुङको आगमनसँगै यसपटकको ल्होसार थप ब्यापक हुने संस्थाका सचिव मदन गुरुङले विश्वास व्यक्त गरे ।

गुरुङ र नेपाली गीत गरेर झण्डै साढे दुई दर्जन गीतमा आफ्नो आवाज भरिसकेकी कलाकार गुरुङ सहित स्थानीय कलाकारहरुको बेजोड साँस्कृतिक प्रस्तुति रहने सो कार्यक्रममा स्वादिष्ट नेपाली खानाको परिकारको व्यवस्था गरिने ल्होसार कार्यक्रम संयोजक तारा गुरुङले बताए । आमन्त्रित कलाकार पवित्र गुरुङको प्रस्तुति रहने तमू धीं दक्षिण कोरिया थेगु शाखाद्धारा आयोजित “तमू ही-ल्होसार २०७९” लाई सभ्य र भव्य सफल बनाउन कोरियामा रहेका सम्पूर्ण तमू (गुरुङ) तथा गैर तमू दाजुभाई तथा दिदीबहिनीहरु एवं संघसंस्थाहरुलाई गरिमामय उपस्थितिको लागि आयोजक संस्थाले हार्दिक अनुरोध गरेको छ ।