कवि पराजित पोमूको ‘म द्धारा मेरो निर्माण’को विमोचन

कोरियामा रहेका कवि पराजित पोमूको कविता संग्रह ‘मद्धारा मेरो निर्माण’ विमोचन भएको छ । आइतबार भएको विमोचित कविता संग्रहमा ३८ वटा कविता संग्रहीत छन् ।
तीन वटा खण्डमा बाँडिएको पुस्तकमा विचार, जीवन भोगाई र दर्शनलाई छोएर लेखिएका कविताहरु रहेका छन् । फिनिक्स बुक्सले प्रकाशन गरेको ‘म द्धारा मेरो निर्माण’को कवि मोमूको दोस्रो कविता संग्रह हो । यस अघि उनले ‘लेप्मुहाङको डुङ्गा’ नामक कविता संग्रह प्रकाशन गरेका थिए ।
पुस्तक विमोचन कार्यक्रमको प्रमुख अतिथि आदिवासी जनजाति महासंघ कोरियाका कार्यवाहक अध्यक्ष बिशन राईले आदिवासीहरुको आवाज कवितांश भएर आउनु सकारात्मक भएको बताए । इतार अभियान र आदिवासी जनजाति साहित्यकार लेखक महासंघ दक्षिण कोरियाको आयोजित पुस्तक सार्वजानिक तथा परिचर्चामा वक्ताहरू केरुङ हाङसेङ, जीवन खत्री, शकुन आँसु, विष्णु सन्यास, ह्यारी बोण्ड, आरएन अधिकारी, सुष्मा रानाहँमा, सेसेफुङ, दिपा मेवाहाङ राईले कृति माथि चर्चा, सुझाव र त्रृटि बारे सुझाए । साथै कृतिको एक–एक कवितासमेत वाचन गरेका थिए ।
कवि पोमूले वक्ताहरूले दिएको सुझावलाई धन्यवाद दिदै पुस्तकमाथिको टिप्पणीलाई सकरात्मक रूपमा बुझिदिनु अनुरोध गरे । त्यस्तै कविताहरूमा पहिचान मुद्धा र सिमान्तकृतको आवाज बोलेको जनाकारी दिए । त्रृटिपूर्ण शब्द र सम्पादनलाई आगामी दिनमा सुधार गर्दै जाने प्रतिबद्धता पनि व्यक्त गरे ।
इतर अभियान नामक साहित्यका अभियन्ताका रुपमा समेत रहेका कवि पोमूलाई सम्मान समेत गरिएको थियो । पुस्तक सार्वजानिक तथा परिचर्चामा कार्यक्रमको सभापति कवि सुष्मा रानहँमा गरेकी थिइन् ।