हाङगाङको किनारामा होली
हाङगाङ खोला छेउका रुखका पातमा अझै मुना पलाएका छैनन् । अप्रिल तिर भएको भए कोरियाली भाषामा फत्कोछी भनिने पैयूँ फुलेर हरियालीले रमाइलो हुने ठाउँ हो । तर अझै कोरियामा चिसो सकिएको छैन । यस्तै चिसोमै आइतबार सोल क्षेत्रमा बस्ने नेपालीले झन्डै चार बर्ष पछि होली कार्यक्रम हाङगाङको किनारामा गरेर रमाइलो गरे ।
कोरियामा क्रियाशिल विभिन्न संस्थाहरु मिलेर गरेको कार्यक्रममा बाक्लै नेपाली पुगेका थिए । काम र ब्यस्त जिन्दगी कोरियामा रहेका नेपालीको दैनिकी हो । फुर्सतको समायमा रमाइलो गर्न पुगेका नेपालीहरुको भनाई थियो । नेपाल पत्रकार महसंघ दक्षिण कोरियाका उपाध्यक्ष विक्रम बज्यू पनि कोरियामा विभिन्न रंग खेलेर रमाइलो गर्न पाउँदा दंग थिए । ‘कोरोना महामारीका कारण हामीले यसरी खुल्ला ठाउँमा भेला हुन पाएका थिएनौं । झन्डै चार बर्ष पछि यसरी रंग खेलेर रमाइलो गर्न पाउँदा नेपालमै रमाइलो गरेको जस्तो लाग्यो ।’ उनले भने ।
परदेशमा नेपाली चाडबाड मनाउँदा मनमा घर पुगेको जस्तो लाग्ने विपी भट्टराइकाे अनुभव छ । ‘बल्ल बल्ल नेपाल जान पाइन्छ । त्यो बेला के चाडबाड पर्छ थाहा हुँदैन । बरु यतै यसरी मिलेर रमाइलो गर्दा मनमा आनन्द आउँदो रहेछ ।’ उनले भने । उनी सोल देखि ४० किलो मिटर टाढा पर्ने ख्याङ्जू कार्यक्रममा सहभागि हुन पुगेका हुन् ।
कार्यक्रममा कोरियाका लागि नेपाली राजदुत ज्योती भन्डारी प्याकुरेल पनि पुगेकी थिईन् । उनी सार्वजानिक कार्यक्रममा विरलै उपस्थित हुने गर्छिन् । कार्यक्रम कोरियामा भएको १९ वटा संस्थाहरु मिलेर गरेको अयोजक संस्था पाँचस दक्षिण कोरियाका वरिष्ठ उपाध्यक्ष गुरुदत्त न्यौपानेले जानकारी दिएका छन् । ‘खुल्ला पार्कमा लामो समय पछि कार्यक्रम गर्दा केही चुनैती थिए । कार्यक्रममा सहभागिता जनाएका सबैले सहयोग गरेका कारण रमाइलो गरेर कार्यक्रम सकियो ।’ उनले भने ।
दिउँसो १२ बजेबाट सुरु भएको कार्यक्रममा कोरियामा रहेका कलाकारहरुले गीत र नृत्य प्रस्तुत गरेका थिए भने नेपाली परिकार सेलरोटी र आचारको मज्जा पनि लिएका थिए ।
फाेटाे साभार केडी स्टुडियाेकाे फेसबुकबाट
