कोरियामा अन्तराष्ट्रिय बुद्धिजम एक्स्पो सम्पन्न

दक्षिण कोरियाको राजधानी सोलमा अन्तराष्ट्रिय बुद्धिजम एक्स्पो सम्पन्न भएको छ । चार दिन सम्म चलेको एक्स्पोमा नेपालबाट सोल नेपाल गुम्बा र न्यू लक्की थाङ्का टे«जर्सले सहभागिता जनाएका थिए ।
बुद्ध र बौद्धधर्मका विभिन्न पक्षलाई प्रदर्शनीमा राखिएको थियो । भारत, नेपाल, श्रीलंका, थाईल्यान्ड लगाएतका बुद्ध धर्म मान्ने देशहरु सहित कोरियामा रहेका झन्डै चार सय भन्दा बढि बौद्ध धर्म सम्वन्धी काम गर्ने संघसंस्थाको सहभागिता रहेको थियो । मार्च ३० तारिखबाट आइतबारसम्म चलेको प्रर्दशनीमा पाँच लाख मानिसले अवलोकन गरेको आयोजकले जनाएका छन् ।
सन् २०१३ देखि सुरु भएको बुद्धिजम एक्स्पो कोरियाको बुद्ध धर्म सम्वन्धी सबै भन्दा ठूलो एक्स्पोमा पर्छ । नियमित रुपमा सहभागिता जनाउँदै आएको लक्की थाङ्काका किरण न्यौपानेले नेपालबाट कोरिया आएर देश र बुद्धको बारेमा भन्न पाउँदा खुशी लाग्ने बताए । ‘हामी निरन्तर सहभागिता जनाइ रहेका छौं । यस्तो सहभागिताले नाफाघाटा भन्दा पनि नेपालको बौद्ध धर्म र हाम्रा पराम्पराका बारेमा जानकारी दिन पाउँछौं । नेपाली थाङ्काको पनि राम्रै बजार छ यहाँ ।’ उनले भने ।
धेरै कोरियालीलाई नेपाल बुद्ध जन्मेको देश हो भनेर भन्ने पनि थाहा नभएको सोल नेपाल गुम्बाका लामा प्रमुख कुन्साङ दार्जे लामाको अनुभव छ । ‘म लामो सयम देखि कोरियाको बौद्धमार्गीहरुसँग सहकार्य गरेर काम गरि रहेको छु । धेरैलाई हाम्रो देशमा बुद्ध जन्मेको भन्ने नै थाहा छैन । त्यसैले यस्तो ठूलो एक्स्पोमा हामीले हाम्रो देशको बारेमा भन्न सके नेपालमा धार्मिक पर्यटन भित्रिन सक्ने सम्भावना छ । यस्तो ठूलो एक्स्पोहरुमा हाम्रो सरकारी पक्षबाटै चासो दिनु पर्छ ।’
कोरियामा सन् २०१५ को जनगनणा अनुसार देशको जनसंख्याको १९ प्रतिशत अर्थात ७६ लाख मानिस बौद्ध धर्मालम्बी भएको तथ्यांक छ । आधा भन्दा बढि जनता कुनै पनि धर्म नमान्ने कोरियामा इसाई धर्म पछि दोस्रो ठूलो धर्मको रुपमा बौद्ध धर्म रहेको छ । कोरियाली बौद्ध पराम्परा र विश्वमा भैरहेको बौद्ध धर्मका विभिन्न पक्षलाई प्रर्दशनीमा राख्ने प्रयास भएको बुद्धिजम एक्स्पोका आयोजक जोगे अर्डर अफ कोरियन बुद्धिजमले जनाएको छ ।
एक्स्पोमा कोरियाली बौद्ध गुरुहरुले सम्बोधन गरेका थिए भने कोरियाली व्यान्डहरुले लाईभ सांस्कृतिक कार्यक्रमहरु पनि प्रस्तुत गरेका थिए ।