अमेरिकाले दक्षिण कोरियाली सरकारको जासुसी गरेको खुलासा कोरियाली राष्ट्रपतिको भ्रमणमा असर पर्नसक्ने
दक्षिण कोरियाली राष्ट्रपति यून सुक योल अप्रिल २६ मा अमेरिका भ्रमणमा जाँदैछन् । अमेरिका र कोरियाबीच द्विपक्षीय सम्बन्ध स्थापना भएको ७०औं वर्षगाँठका अवसरमा विभिन्न कार्यक्रमहरू आयोजना हुँदैछन् । भ्रमणको मुखैमा अमेरिकी गुप्तचरहरूले यहाँको सरकारको जासुसी ‘वायरट्यापिङ’ गरेको खुलेपछि कोरियाली राष्ट्रपति दबाबमा छन् ।
कोरियाली प्रमुख प्रतिपक्ष दल एक महिनाअघि राष्ट्रपतिले जापानको भ्रमण गरेर आएदेखि नै आन्दोलनमा छ । जनताले पनि राष्ट्रपतिको जापान भ्रमणमा भएका विभिन्न सम्झौता मन नपराएकोले लाखौं जनता सडकमा आएकोले देखाउँछ । यहाँ राष्ट्रपतिको काम कस्तो भएको छ भनेर ‘रेटिङ’ गर्ने चलन छ । प्रत्येक महिना उनको रेटिङ घटेको घट्यै छ । त्यसैले उनी जापान भ्रमणलाई सकारात्मक भनेर आफ्नो बचाउ गरिरहेका छन् । यस्तैमा अमेरिकी गुप्तचरले वायर ट्यापिङ गरेको जानकारी लिक भएपछि उनी थप दबाबमा परेका छन् ।
पूर्वराष्ट्रपतिका विदेश मामिला प्रमुख ली मुन–हीले कोरियाली राष्ट्रिय सुरक्षाका पूर्वनिर्देशक किम सुङ–हानलाई युक्रेनमा के कस्तो सहयोग गर्ने भन्ने सरकारी निर्णय नभएसम्म कोरियाली राष्ट्रपति र अमेरिकी राष्ट्रपतिबीचमा फोनमा केही बोलिहाल्न नमिल्ने बताएको रिपोर्टमा छ ।
लीले अमेरिकी दबाबमा सोलले घातक हतियार युक्रेनलाई प्रदान नगर्ने आफ्नै अडानविरुद्ध जान नसकिने बताएका थिए । यदि सहयोग गर्ने परे विकल्प भनेको कोरियाली राष्ट्रपति यून अमेरिका भ्रमण जाँदा र हतियार किनबेचको सम्झौता गरेर सहयोग गर्न सकिने सल्लाह दिएको रिपोर्टमा छ ।
सत्यतथ्य पत्ता लगाउन दक्षिण कोरियाले के प्रयास गरिरहेको छ भनेर अहिलेसम्म कुनै जानकारी भने दिएको छैन । कोरियाली राष्ट्रपति यहाँ विवाद वाशिंटनले चर्को रूपमा नसुनोस् भन्ने चाहन्छ । त्यसैले देशमा ठोस जानकारी नदिएरै आगामी अप्रिल २६ मा हुने यून–बाइडेन शिखर सम्मेलनको मुडलाई बिगार्न चाहँदैन ।
युनको भ्रमणलाई बाइडेन प्रशासनले मात्र नभई अमेरिकी कंग्रेसले पनि स्वागत गरेकोले यो विवादले दक्षिण कोरिया र अमेरिकाको गठबन्धनलाई अझ बलियो बनाउने दुई देशको सम्बन्धमा उत्साह बढाउने धारणा सोलको छ । यद्यपि, यूनले वायरट्यापिङको आरोपमा अमेरिकाबाट माफी माग्नका लागि बढ्दो घरेलु दबाबको सामना गर्नुपरेको छ ।
‘(दक्षिण कोरियाली) सरकार र राष्ट्रपतिले लिक भएका कागजातहरू र रिपोर्टहरूको बारेमा उचित जानकारीको माग गर्नुपर्छ र जनतालाई के भएको हो जानकारी दिनुपर्छ,’ मुख्य प्रतिपक्ष दल डेमोक्रेटिक पार्टी अफ कोरिया (डीपीके) नेता पार्क होङ–कुनले सोमबार पत्रकार सम्मेलन गरेर भनेका छन् ।
‘यदि पुष्टि भयो भने, यो एक अस्वीकार्य अभ्यास हो जुन ७० वर्षको गठबन्धनमा सहन सकिँदैन र दक्षिण कोरियाको सार्वभौमसत्ताको स्पष्ट उल्लङ्घन हो । जसले द्विपक्षीय विश्वासलाई चकनाचूर पार्छ । अमेरिकी सरकार आफ्नो सहयोगीप्रति वफादार हुनुपर्छ र दक्षिण कोरियाली जनता र कोरियाली जनतासँग माफी माग्नुपर्छ,’ पार्कले अगाडि भनेका छन् ।
अर्को विपक्षी दल जस्टिस पार्टीका अध्यक्ष ली जियोङ–मीले पनि वायरट्यापिङका आरोपहरू ‘कल्पनाभन्दा बाहिर’ भएको र दक्षिण कोरियाली सरकारले संयुक्त राज्य अमेरिकाबाट स्पष्ट तथ्य, माफी र पुनरावृत्ति रोक्ने वाचाको हुन पर्ने बताएका छन् ।
राष्ट्रियसभाका रक्षा, परराष्ट्र तथा गुप्तचर समितिका विपक्षी सांसदहरूले संयुक्त पत्रकार सम्मेलन गरी आरोपको छानबिन गर्न सत्तारुढ जनता पार्टी (पीपीपी) लाई स्थायी कमिटी बैठक बोलाउन सहमत गराउन माग गरेका छन् । (कान्तिपुरबाट साभार)
