गोतोजी छोर्तोजीको तेश्रो शृङ्खला भाषाविद् अमृत योञ्जनसँग
नेपाल तामाङ घेदुङ दक्षिण कोरियाद्वारा सञ्चालित कार्यक्रम “गोतोजी छोर्तोजी” अर्थात् “बुझौँ र जागौँ” को तेश्रो शृङ्खला भाषाविद् अमृत योञ्जनसँग हुने भएको छ ।
नोभेम्बर २५ तारिख शनिबार हुने कार्यक्रममा भाषा आयोगको सदस्य समेत रहेका योञ्जनसँग तामाङ भाषा सम्बन्धी अन्तर्कृया हुने कार्यक्रम संयोजक केशव मान तामाङले बताएको हो ।
गत कार्तिक २३ गते ‘प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक, २०८०’ प्रदेश सभाबाट पारित भएर प्रमाणिकरण समेत भाईसकेको छ । यो सँगै नेवारी र तमाङ भाषा पनि प्रदेश भित्र सरकारी कामकाजको भाषाको रुपमा प्रयोग गर्न बाटो खुलेको हो । “यस सन्दर्भमा सरकारी कामकाजी भाषाको रुपमा तामाङ भाषा कार्यन्वयन गर्न के कस्तो तयारी छ भन्ने बारेमा कार्यक्रममा बहस र अन्तरक्रिया हुने छ ।” संयोजक तामाङले फोनिज कोरियालाई बताए ।
नेपाल तामाङ घेदुङ दक्षिण कोरियाको अफिसियल फेसबुक पेजबाट प्रत्यक्ष प्रसारण हुने यस कार्यक्रम नेपालको समय र मिती अनुसार मङ्सिर ९ गते शनिबार साँझ ६ बजे र कोरियामा नोभेम्बर २५ तारिख बेलुका ९:१५ मा हुने कुरा घेदुङको अध्यक्ष राजकुमार स्याङतान तामाङले बताएको छ ।
अनलाईन माध्यमबाट सञ्चालन गर्दै आएको यस कार्यक्रमलाई विश्वभर छरिएर रहेका तामाङ तथा अन्य समुदायको दर्शक श्रोताहरू बाट सकारात्मक प्रतिक्रियाहरू आइरहकोमा अध्यक्ष तामाङले खुसी ब्यक्त गरेको छ । साथै कार्यक्रममा सहभागी भएर तामाङ भाषा सम्बन्धि जान्न, बुझ्न र प्रश्नहरू भएको खण्डमा प्रश्नहरू राखिदिएर सहयोग गर्न दर्शक श्रोताहरू माँझ अनुरोध समेत गरेको छ ।
तामाङ, भाषा, धर्म, संस्कार, संस्कृति, इतिहास र साहित्य बारे तामाङ तथा अन्य समुदायको व्यक्तिहरूलाई बुझ्न र बुझाउने उदेश्यले यस कार्यक्रमा सञ्चालन गरिएको हो । अङ्ग्रेजी महिनाको अन्तिम शनिबार हुदै आएको कार्यक्रम यस पटक नोभेम्बर २५ तारिखको दिन परेको छ।
भाषा आयोगको सदस्य अमृत योञ्जन तामाङ भाषिक अधिकारको निम्ति निरन्तर संघर्ष र अभियानमा लागि रहेका एक अभियन्ता हुन । भाषाविज्ञानमा स्नातकोत्तर गरेका उनी लामोसमयसम्म शिक्षा मन्त्रालय अन्तर्गत सञ्चालित ‘मातृभाषामा शिक्षा’ कार्यक्रमको प्राविधिक सल्लहाकारको भूमिकामा रहेर मातृभाषा पाठ्यक्रम विकास निर्माण तथा पठनपाठन गर्ने सवालमा महत्वपुर्ण योगदान पुर्याएको छ ।
संयुक्तराष्ट्रसंघ विकास नियोग (युयानडिपि), अन्तर्राष्ट्रिय श्रमसंगठन, युनेस्को लगायत विभिन्न अन्तर्राष्ट्रिय संस्था तथा विकास नियोगमा अनुसन्धानकर्ता, प्रक्षिक्षक र कन्सल्टैन्टको रुपमा कार्य गरिसकेको छ । यस्को अलवा विशेषगरी आदिवासीहरुको भाषाको विषयमा दजनौ (५२ वटा भन्दा बढी) पुस्तक, शब्दकोशहरु प्रकाशन भएको छ भने विभिन्न राष्ट्रिय तथा अन्तर्राष्ट्रियस्तरबाट प्रकाशित जर्नलमा लेखहरु लेखन तथा सम्पादनको साथै सभा सम्मेलनहरुमा कार्यपत्रहरु प्रस्तुत भएको छ ।
भाषाविद् योञ्जनकै नेतृत्वमा अहिले तामाङ राष्ट्रिय पुस्तकालय सञ्चालन भइरहेको छ । जहाँ तामाङ भाषा साहित्य लगायतका अन्य पुस्तकहरुको संकलन भइरहेको छ।
