कोरियामा एक हप्तामा चार नेपालीको मृत्यू
नेपालमा धेरै नेपाली युवाहरु कोरिया आउनका भाषा परिक्षा दिनका लागि फर्म भरि रहँदा कोरियामा रहेका नेपालीले भने एक पछि अर्को दुःखद् समाचार सुनिरहेका छन् । यहाँ एक हप्तामा चार जना नेपालीले ज्यान गुमाएका छन् । दुई जनाको सुतेकै अवस्थामा मृत्यू भएको छ भने विरामी भएर उपचारको क्रममा र कम्पनीमा दुर्घटना भएर एक एक जनाले ज्यान गुमाएका छन् ।
सोल देखि तीन सय किलोमिटर टाढा गजेदोको पानी जहाज बनाउने कम्पनी हान्वा ओसनमा कार्यरत सोलुखुम्बू नेचासल्यान गाउँ पालिकाका रन्जन राईको सुतेकै अवस्थामा शनिवार मृत्यु भएको हो । उनी सोलुखुम्बू सेवा समाजका पुर्व उपाध्यक्ष समेत रहेका थिए । सामान्य रुपमा काम गरेर आएको र सुतेको जानकारी कम्पनीमा काम गर्ने साथीहरुले जानकारी गराएको सोलुखुम्बू समाजका अध्यक्ष राजु राईले बताए । ‘सबै ठीकै थियो रे स्वास्थ्यमा पनि कुनै समस्या थिएन भन्छन् । कोरियाको कामले हो कि के भएको हो थाहा पाउन सकिएको छैन ।’ उनले भने । मृतकको शवलाई पोस्टमार्टमको लागि हस्पिटल लगिएको र दूतावासलाई जानकारी गराई सकिएको साथै मृतकको परिवार संग सम्पर्क भैसकेको अध्यक्ष राईले जानकारी दिएका छन् ।
त्यस्तै गत शुक्रबार छुन्छन् नाम्दो येसन सीमा कम्पनीमा दुर्घटनामा पासाङ श्याङबाको निधन भएको थियो । नुवाकोट दुप्चेश्वर बोल्गाङ निवासी पासाङ श्याङ्बा पहिलो पाँच बर्ष सकाएर दोस्रो कार्यकालको रुपमा कोरिया आएकी थिईन । दोस्रो कार्यकाल आएको एक बर्ष बितेको ह्योल्मो सम्पर्क समितिका निर्वतमान अध्यक्ष बाबुज्यावा ह्योल्मोले जानकारी दिएका छन् । ‘मेरो त दिदीको छोरी हुन उनी । सबै ठीकै थियो । ठूलो विल्डिङहरु बन्दा लगाउने सेफ्टी नेट, प्यारासुटहरुमा प्रयोग हुने धागो बनाउने कम्पनीको काम थियो । त्यति खतरायुक्त काम पनि होइन । दिन आए पछि के भन्न सकिने रहेछ र ?’ उनले प्रतिप्रश्न गरे ।
‘कोरियाले मान्छेलाई कति खेर लैजान्छ थाहा नै नहुने । अरु दिन उनको डिपार्टमा अन्य मान्छे पनि हुने रहेछ । दुर्घटनाको दिन उनी एक्लै रहिछिन् । कति कसैले बेलैमा सहयोग गरेको भए ज्यान बच्थ्यो कि जस्तो पनि लाग्छ ।’ उनले थपे । सबै प्रक्रिया पुरा भए शुक्रबारसम्म शवलाई नेपाल पठाउने पनि उनले जानकारी दिए ।
छनानमा कार्यरत याङ्नाम पाँचथर लिगिम्बाका नरेन्द्र केरुङको पनि सुतेको अवस्थामा निधन भएको थियो । केरुङ बिगत ७ बर्ष कोरिया काम गर्दै आएका थिए । उनको पनि शुक्रबार नै मृत्यू भएको हो । सोमबार विरामी भएर उपचार गराउने क्रममा मोरङका रोहित मगरको मृत्यू भएको हो । उनी थेगु क्षेत्रमा काम गर्दै आएका थिए । कोरिया आएको एक बर्ष पनि नभएको नेपाल मगर संघका अध्यक्ष टिवी घर्तीमगरले बताए । ‘केही समय अघि पनि विरामी भएर अस्पताल गएको भन्ने जानकारी पायौं । फेरी हिजो विरामी भएर अस्पताल लैजाँदा दुखद् घटना सुन्न प¥यो ।’ उनले भने ।
