एम टि यूको प्रतिनिधि सभा बैठक सम्पन्न, WPS को लागि संघर्ष गरिने

प्रवासी श्रमिकहरुको अधिकारको निम्ति आवाज उठाउँदै आएको संस्था प्रवासी श्रमिक युनियन MTU दक्षिण कोरियाको प्रतिनिधि सभा बैठक २०२४ सम्पन्न भएको छ। सौल स्थित कोरियन प्रजातान्त्रिक श्रमिक महासंघ (केसिटियू) को हलमा सम्पन्न सभाले गतवर्षको गतिविधिहरुमाथि छलफल एवम मूल्याङ्कन गर्दै आर्थिक विवरण र लेखा परिक्षणको प्रतिवेदनलाई बहुमतले पारित गरेको छ।

सभाले आगामि वर्षको MTU को कार्य योजना र बजेट योजना माथि सुझाव संकलन गर्दै त्यसलाई बुँदागत रुपमा राखेर विशेष घोषणा पत्र पारित गरेको छ। घोषणा पत्रमा विशेषगरी कार्य अनुमति प्रणाली (Work Permit System WPS) लाई लागु गराउने संघर्षलाई शशक्त बनाइने उल्लेख गरिएको छ। यसैगरि घोषणा पत्रमा “स्वैच्छिक कार्यस्थल परिवर्तन , उचित आवस सुनिश्चितता, औद्योगिक दुर्घटनाको अन्त्य, तलब भुक्तान नगर्ने गतिविधिको अन्त्य, कृषि मत्स्यपालन क्षेत्रमा गरिने भेदभावको निर्मूल, महिला अधिकार सुनिश्चित, भिसा बिहिन श्रमिकलाई भिसा पाउनुपर्ने, जातिय भेदभाव निर्मूल लगायत प्रवासी श्रमिकको सबै अधिकारको लागि संघर्ष गर्नेछौँ।” भनिएको छ।

प्रवासी श्रमिक युनियनको विभिन्न गतिविधि, बैठक , आन्दोलन आदिमा सकृय रुपमा लागिपर्ने सदस्यहरुलाई MTU अध्यक्ष उदय राईले सम्मान पत्रद्वारा सम्मान गरेको छ। सम्मानित हुनेहरुमा शान्ती तामाङ, नरेन्द्र लिम्बू, बारुद राई, अलि मोहम्मद सादि र चन्द्र श्री तपस रहेका छन्।