मोडलिङमा जम्दै एलिसा
दक्षिण कोरिया – पछिल्लो समय दक्षिण कोरियामा छायांकन गरिएको म्युजिक भिडियोले नेपाली सांगीतिक क्षेत्रमा चर्चा पाएको छ । जसले गर्दा कोरियामा रहेका नेपाली युवाहरुले समेत आफ्नो प्रतिभा प्रदर्शन गर्ने राम्रो मौका पाएका छन् । कोरियामा कामको व्यस्ततासँंगै नेपाली गीतसंगीत र मोडलिङमा आफ्नो करिअर बनाउदै आएका प्रतिभाशाली युवाहरुमध्ये एक हुन् एलिसा सिंह ।
विगत लामो समयदेखि कोरियामा रहेर नेपाली म्युजिक भिडियोमा अभिनय गर्दै आएकी एलिसा रहरै रहरमा मोडलिङमा लागेपनि अब भने ब्यवसायिक रुपमै अगाडि बढने बताउँछिन् । भन्छिन्, ‘मोडलिङ मेरो पेशा होइन रहर हो । तर भविष्यमा यसैलाई अगाडि बढाउने सोच छ ।’
रामकृष्ण ढकाल, राजेशपायल राई, अन्जु पन्त, रजिना रिमाललगायतका चर्चित गायकगायिकाहरुको स्वरमा अभिनय गरिसकेकी एलिसाले एकदर्जन भन्दा बढी म्युजिक भिडियोमा अभिनय गरिसकेकी छिन् । हप्तामा एउटा म्युजिक भिडियो बनाउदै आएकी एलिसा अभिनयसँंगै म्युजिक भिडियोको निर्देशन र कोरियोग्राफी पनि आफैं गर्छिन् । ‘अभिनय त केही समयसम्म मात्र हो त्यसैले डाइरेक्सनमै बढी जोड दिन्छु,’ उनी भविष्यको योजना सुनाउँछिन् । कोरियामा छायांकन गरिएको उनका अधिकांश म्युजिक भिडियो रिलिज हुने तयारीमा छन् ।
सन् २०१० मा वैदेशिक रोजगार प्रणाली (इपिएस) बाट कोरिया आएकी एलिसा छुट्टीमा नेपाल गएको बेला निर्मला गिरीको शब्द र कल्पना थापाको स्वर रहेको ‘आजभोली किन किन रुन्छ मन खाली यो संसारमा सबैभन्दा माया रैछ जाली’ बोलको आधुनिक गीतमा अभिनय गर्ने मौका पाइन् । उक्त म्युजिक भिडियो पछि अरु धेरै म्युजिक भिडियोमा अभिनय गर्ने अवसर पाएकी एलिसा भन्छिन्, ‘ अहिले त नेपालबाटै कलाकारहरुले फोनबाट म्युजिक भिडियो बनाइदिनु भनेर अफर गर्छन् । ’
कोरियाको क्यामरादेखि सबै प्रविधि नै राम्रो र गुणस्तरीय भएकोले पनि कोरियामा छायांकन गरिएका म्युजिक भिडियो राम्रो हुने उनको दावी छ । उनका अनुसार कोरियाको गगनचुम्बी भवन, समुद्र र अन्य सुन्दर पार्क, सफा बाटोघाटो र सुविधासम्पन्न सहरको दृश्यले पनि म्युजिक भिडियोलाई थप आर्कषक बनाउने भएकोले पनि कोरियामा छायांकन गर्ने क्रम बढेको हो ।
काठमाडौको आरआर क्याम्पसबाट पत्रकारिता विषयमा स्नातक स्याङजाकी एलिसाले मोडलिङमा लाग्ने सोचेकी समेत थिइनन् । यद्यपि सानैदेखि नाच्न गाउनमा भने उनलाई औधी रुचि । कोरियन चलचित्र र टेलिसिरियलमा देखिने कोरियाली जीवनशैलीबाट प्रभावित एलिसाले कोरियन भाषा सिकेर इपिएस उतिर्ण गरेर कोरिया आइन् । ‘म बाध्यताले भन्दा पनि रहरले कोरिया आएकी हुँ’, उनी कोरिया आउनुको कारण खोल्छिन् । ‘तर, सोचे जस्तो सजिलो कहाँ रहेछ र कोरिया । टिभीमा अग्लाअग्ला अपार्टमेन्टमा मिनिस्कर्ट लगाएर काम गरेको देखेको यहाँ त सिधै भिनिल हाउसमा काम गर्न पठाउदा तीनचार महिना त रोइयो नि’, उनी त्यो क्षण कहिल्यै भुल्दिनन् ।
सुरुमा धेरै गाह्रो भएपनि उनले यहाँ धेरै कुरा सिक्ने र बुझने मौका पाइन् । ‘मुख्य त समयको महत्व र श्रम गर्न सिकें ।’ धेरै पढनेले सानोतिनो काम गर्नुहुन्न भन्ने नेपालीको मनस्थिति भएकै कारण अधिकांश युवाहरु विदेशिने गरेको यथार्थसँग उनी पनि परिचित छिन् । भन्छिन्, ‘किनभने हाम्रो शिक्षाले श्रम गर्नुपर्छ भन्ने सिकाउदैन । के, पढने मान्छेले हलो जोत्नु हुन्न र ?’
कोरिया आउन चाहनेलाई उनी म श्रम गर्न जाने हो जस्तोसुकै गाह्रो काम पनि गर्न सक्छु भन्ने मनस्थिति बनाएर आउन सल्लाह दिन्छिन् । म कामदार होइन दक्ष जनशक्ति हुँ भन्ने सोच लिएर काम गरेमा गाह्रो नहुने उनको बुझाइ छ । कोरियामा सिकेको सिप र ज्ञानलाई नेपाल फर्केपछि त्यहि क्षेत्रमा लगाउन सके नेपालको विकाश हुन समय नलाग्ने उनको जिकिर छ । ‘तर विडम्वना हामी जति कुरा गर्छौं व्यवहारमा उर्तादैनौ’, उनी भन्छिन् ।
