यूवा तथा खेलकुद मन्त्री श्रेष्ठ कोरिया आउने
माननिय यूवा तथा खेलकुद मन्त्री तथा राष्ट्रिय स्वतन्त्र पार्टीका संसदीय दलका उपनेता विराज भक्त श्रेष्ठ कोरिया भ्रमणमा आउने भएका छन्। यहि जुन २८ तारिख देखि एक हप्ते कार्यक्रम लिएर उच्च स्तरीय टोली सहित माननिय श्रेष्ठ दक्षिण कोरिया आउन लागेका हुन्।
दक्षिण कोरियाको संस्कृती तथा खेलकुद मन्त्रालय र “कोईकाको ” निमन्त्रणामा दक्षिण कोरिया आउन लागेक हुन्। भ्रमणका क्रममा युवा तथा खेलकुद मन्त्री श्रेष्ठले कोरियाको संस्कृती तथा खेलकुद मन्त्री यु ईन छोनसंग उच्च स्तरीय भेटवार्ता गर्ने कार्यक्रम रहेको छ। भेटवार्तामा दुई देश बीच खेलकुदको विकास तथा अन्य विषयहरुमा सम्झौता गर्ने कार्यक्रम रहेको कोरियाका लागी नेपाली दूतावासका उपनियोग प्रमुख पुष्प राज भट्टराईले फोनिज कोरियालाई जानकारी दिएका छन्।
राष्ट्रिय स्वतन्त्र पार्टी प्रवास नेपाली सम्पर्क विभाग दक्षिण कोरियाले जुन ३० तारिख आईतबारको दिन भेटवार्ता एवम संवाद कार्यक्रमपनि आयोजना गर्ने भएको छ। सिओलको तोङ्गदेमुन स्थित नेपाली एण्ड थाई रेष्टुरेन्टको सभाहलमा दक्षिण कोरियामा रहेको विभिन्न नेपाली संघ संस्थाहरुसंग माननिय युवा तथा खेलकुद मन्त्री श्रेष्ठसँग भेटवार्ता तथा संवाद कार्यक्रमको आयोजना गर्न लागेको प्रवास नेपाली सम्पर्क विभाग दक्षिण कोरियाका प्रमुख डम्बर सुब्बाले अवगत गराएका छन्।
सोही कार्यक्रममा माननिय यूवा तथा खेलकुद मन्त्री श्रेष्ठले दक्षिण कोरियामा खेलकुदसंग सम्बन्धीत विभिन्न नेपाली संघ संस्था तगायत खेलाडीहरुलाई सम्मान गरिने कार्यक्रम पनि रहेको छ।
