अमिर योन्जन । नेपाल आदिवासी जनजाति महासङ्घ (नेफिन) दक्षिण कोरियाले आगामी योजनामा चियापान, अन्तरक्रिया, नेफिन हाउस, आदिवासी जर्नल प्रकाशनसम्मका भावी योजना तथा कार्यक्रम सार्वजनिक गरेका छन् । गत आइतबार सउलको दोङ्देमुनमा वार्षिक साधारण सभामा महासचिव दयाराम राना मगरले प्रस्तुत गरेको १७ पृष्ठ लामो साङ्गठनिक तथा कार्य योजना प्रतिवेदनमा सो योजनाहरू रहेका छन् ।
३०औँ आदिवासी दिवसको अवसरमा आगामी अगस्ट ११ मा ‘आदिवासी आन्दोलन हिजो, आज र भोलि विषयक बृहत् अन्तरक्रिया’ गर्ने, छुसकमा भेटघाट तथा चियापान गर्ने, छैटौँ कार्यसमिति नेफिन हाउस निर्माण गर्ने उद्देश्यले स्थापित आदिवासी उत्थान कोषको रकमबाट जनजातीय सांस्कृतिक घर स्थापना गर्ने कार्यक्रम रहेका छन् । त्यस्तै यहाँ रहेका जातीय संस्थाहरूको संस्थागत इतिहासलाई दस्तावेजिकरण र आदिवासी साहित्यकार, लेखकहरूको लेख, रचना, अनुभवहरू आदिलाई समाहित गरी आदिवासी जर्नल प्रकाशन गर्ने र प्रत्येक चौमासिक आदिवासीहरूको विविध विषयमा प्रत्यक्ष एवं भर्चुअल स्वतन्त्र बहस तथा प्रशिक्षात्मक कार्यक्रम गर्ने रहेका छन् ।
प्रतिवेदनमा संस्थापक अध्यक्ष चङ्गकुमार गुरुङदेखि सातौँ कार्यसमितिको अध्यक्षको फोटो, कार्य अवधि र वर्तमान आठौँ कार्यसमितिको संरक्षकदेखि सदस्यसम्मको फोटो उल्लेख रहेका छन् । क्षेत्रीय शाखा बुसान र जेजुदोको पनि अध्यक्षहरूको कार्यविधि र फोटो राखेका छन् । त्यस्तै वर्तमान कार्यसमितिका ४६ जनाको जम्बो सल्लाहकारहरूको नाम उल्लेख छन् । र कोरियामा बाह्र वटा जातीय संस्थाहरू अबद्ध रहेका छन् भने थकाली र भुजेलको संस्था निष्क्रिय रहेको उल्लेख छन् ।
प्रतिवेदनमा चार कमीकमजोरी र चुनौतीहरू उल्लेख रहेका छन् । नेफिनको स्थापनादेखिको इतिहासमा नेतृत्व बिचैमा पलायन हुने, स्थापित संस्थाको अस्तित्व जोगाउन कठिन, संस्थाको ऐतिहासिक गतिविधि र बैठकको निर्णयहरूको सुरक्षित नराख्ने वा नयाँ कार्यसमितिलाई हस्तान्तरण नगर्ने र आदिवासी जनजातिको मूलभूत मुद्धाहरुप्रतिको कमजोर बुझाइ रहेका छन् ।
साधारण सभामा आर्थिक प्रतिवेदन कोषाध्यक्ष तेज गुरुङ र आदिवासी उत्थान कोषको विवरण संस्थापक आर्थिक संयोजक आङ सोनाम शेर्पाले प्रस्तुत गरेको थियो ।
नेफिन कोरिया विगतका वर्षहरू प्राय आदिवासी दिवस मनाउने, सम्मान तथा बिदाइ गर्ने, आर्थिक सहयोग गर्ने, कार्यक्रमहरूमा सहभागी हुने जस्ता कार्यक्रमहरूमा मात्रै चलायमान देखिन्छ ।
साधारण सभा वर्तमान संरक्षक लाेचन राईको प्रमुख अतिथिमा अध्यक्ष बिशन राईको सभाध्यक्षतामा सम्पन्न भएको थियाे ।
