ह्वासङ फुटसलको उपाधि धरान एफसीले जित्यो

अमिर याेन्जन । ‘पहिलो ह्वासङ फुटसल कप–२०२४’ उपाधि धरान फुटबल क्लबले जितेको छ । धरानले फाइनल खेलमा सुवन एन ‘वाइड’ फुटबल क्लबलाई ३–१ गोलको अन्तरले जितेको हो ।

प्रतियोगिताको विजेता धरान एफसीले कोरियन तीस लाख वन, सिल्ड, मेडल र प्रमाणपत्र प्राप्त गरेका छन् । उपविजेता सुवन वाइड एफसीले कोरियन बिस लाख वन, सिल्ड, मेडल र प्रमाणपत्र प्राप्त गरेका छन् । त्यस्तै प्रतियोगिताको उत्कृष्ट खेलाडी धरान एफसीको सविन विडारी घोषित भए । प्रतियोगितामा ९ गोल गर्दै सर्वाधिक गोलकर्ता जे.एन. एफसीका खुमाहाङ लिम्बु भए । र उत्कृष्ट गोल रक्षक सुवन एन।एफसीका रूपक नेपाली भए । उनीहरूले नगद १ लाख वन, सिल्ड, मेडल र प्रमाणपत्र प्राप्त गरेका छन् ।

फुटबल प्रवासमा एकता, मनोरञ्जन, स्वास्थ्य जीवनको लागि आवश्यकता’ भन्ने मूल नाराका साथ आयोजना भएको फुटसल प्रतियोगितामा आयोजकसहित ३२ समूहले दर्ता गरेको थियो । १६/१६ टिम गरी पोल ए र पोल बी गरी नकआउट चरणमा खेल खेलाएको थियो । प्रत्येक खेलको १५/१५ मिनेटको समयमा खेलाएको थियो ।

ह्वासाङ नेपाली फुटबल क्लबको आयोजनामा ह्वासङको ह्याङ्नाममा आइतबार प्रतियोगिता सम्पन्न भएको हो । दोस्रो चरणको खेलको दोस्रो हाफ खेलमा फारान फुटबल क्लबका खेलाडी र जेएन एफसीका खेलाडी विवाद हुँदा आयोजकले विवादित दुवै टिमलाई प्रतियोगिताबाट बाहिरिने निर्णय गरेको थियो ।

नेपाल फुटबल महासङ्घ, कोरिया, नेपाल महिला फुटबल परिवार कोरिया र ह्वासाङ नेपाल फुटबल क्लबको संयुक्त आयोजनामा पहिलो पटक महिला मैत्रीपूर्ण प्रतियोगिता पनि भएको थियो ।

प्रतियोगिताको समापन कार्यक्रममा आयोजकले नेपाल फुटबल महासङ्घका अध्यक्ष कृष्ण गुरुङ (ब्रो तमु), फिलिप गुरुङ, विक्रम गुरुङ र मदन राईलाई प्रमाणपत्र र खादाले सम्मान गरे ।

प्रतियोगिताको दोस्रो पुरस्कार नेवारी खाजा घर फारानले प्रयोजन गरेको थियो । गैर आवासीय नेपाली सङ्घ,कोरियाका अध्यक्ष बुद्धि गुरुङ, नेपाल फुटबल महासङ्घ कोरियाका अध्यक्ष कृष्ण गुरुङ (ब्रो तमु), जेबी बैङ्कका डा। कमला साउद र आयोजक ह्वासाङ नेपाली फुटबल क्लबका अध्यक्ष मिन आले मगर लगायतले विजेता टिमलाई पुरस्कार वितरण गरेको थियो ।