मर्स्याङ्दी साङ्गीतिक सौगात भाग–३ मा ‘द एज् ब्यान्ड’को लाइभ साथमा ख्याति प्राप्त कलाकारहरू

अमिर योन्जन ।  कोरियाली चार्ड छुसकको अवसरमा लमजुङ परिवार दक्षिण कोरियाले ‘मर्स्याङ्दी साङ्गीतिक सौगात भाग–३’ आयोजना गर्ने भएको छ । छुसकको अघिल्लो दिन सेप्टेम्बर १५ गते आइतबार ‘द एज् ब्यान्ड’को प्रस्तुतिसँगै चर्चित कलाकारहरूको साथमा लाइभ इन सउल गर्ने भएको हो ।

आइतबार सउलमा पोस्टर सार्वजनिक गर्दै लमजुङ परिवारले ‘द एज् ब्यान्ड’को कलाकारहरूको साथमा चर्चित दोहोरी कलाकार मिलन लामा, डान्स युनिभर्स २०२३ का विजेता खुसी कार्की र नेपाल आइडल सिजन ३ का विजेता सज्जा चौलागाँई साङ्गीतिक प्रस्तुति हुने जनाकारी दिए । साथमा स्थानीय कलाकार टिकटक स्टार तथा डान्सर सुन्दर घलानको बेजाेड प्रस्तुति हुने छ ।

कार्यवाहक अध्यक्ष सन्तोष धिंगालले पोस्टर सार्वजनिक कार्यक्रममा बोल्दै द एज् ब्यान्डका साथमा लोक, नृत्य लगायतका प्रस्तुतिहरूको लागि कलाकारहरू छनोट गरेको बताए । कोरियामा आवास गृह व्यवस्थापन तथा आपतकालीन राहत कोष सहयोगार्थ स्वरूप ‘मर्स्याङ्दी साङ्गीतिक सौगात भाग–३’  आयोजना गर्न लागेका उनले बताए । कार्यवाहक अध्यक्ष सन्तोष धिंगालले भने, प्रवासको ठाउँमा कुन बेला के आपत्, विपत् आउँदो रहेछ, त्यसमा तत्कालै समस्या समाधानको लागि पहिलो कुरा भनेको आर्थिक चाहिने रहेछ र भोगेको पनि छ । र यहाँ रहेको आवास गृह(सेल्टर) व्यवस्थापनमा केही सहयोग जुटाउनका लागि कार्यक्रम आयोजना गर्न लागेका हो । रमाइलोसँगै समस्याहरुको समाधानको लागि गर्नु परेको उनले बताए ।

कार्यक्रम संयोजक जमानसिंह गुरुङले सबै कलाकारको भिसा लागिसकेको बताए । उनले भने, सबै कलाकारको भिसा आइसकेकोले अवस्था हो । त्यसैले प्रचारप्रसार र कार्यक्रम सफल पार्न तयारी तीव्र भइरहेको छ । संयोजक गुरुङले लगभग ६ हजार दर्शक अटाउन सक्ने हलमा कार्यक्रम हुने जानकारी दिए । उनेले भने, दर्शक नअट्ने भन्ने हुँदैन, जति सक्दो आउनुस्, ठाउँ छ । कार्यक्रमको लागि आर्थिक स‌ंयोजक भुमी गुरूङलाई आयाेजकले चयन गरेकाे छ ।

हलमा जानलाई कार्यक्रमको दिन बसको व्यवस्था रहेको आयोजकले बताएको । हलको ठेगाना यस प्रकारको छ: 고려대학교서울캠퍼스화정체육관 (서울 성북구 안엄동5가 126-28) । Korea University, Seoul Campus.