अक्टोबर १३ तारिख दक्षिण कोरियामा वृहत दशैँ महोत्सव हुने
दक्षिण कोरियाको आन्सान सहरमा वृहत महोत्सवको रुपमा दशैँ मनाइने भएको छ। सनातन साहित्य संगीत साधना समूह “पाँच स” , गैर आवासिय नेपाली संघ (एन आर एन ए ) र आन्सान सिटि दक्षिण कोरियाको प्रमूख आयोजना रहने उक्त महोत्सव अक्टोबर १३ तारिखका दिन मनाइने पत्रकार सम्मेलन मार्फत जानकारी गराइएको छ।
नेपालीहरुको महान पर्व दशैँलाई साँस्कृतिक रुपले मनाउँदै प्रवासमा पनि नेपाली सँस्कृतिको संवर्द्धन र प्रवर्द्धन गरि नेपालीको पहिचान झल्काउने उद्देश्य अनुरुप यो महोत्सवको आयोजना गरिएको पाँच स का अध्यक्ष एवम कार्यक्रम संयोजक विष्णु थापाले बताएका थिए। साथै उनले विगतमा पनि मनाउँदै आइरहेको दशैँ कार्यक्रम यो वर्ष कोरियाका ठूला नेपाली संस्थाहरु एकसाथ हुँदा अझ वृहत हुने आशा व्यक्त गरेका थिए। प्रवासमा सबैको चाडलाई नेपाली चाड सम्झेर मनाउनको लागि एन आर एन कोरियाका अध्यक्ष वुद्दि गुरुङले आग्रह गरेका थिए। यसैगरी एन आर एन कोरियाका महासचिव डा केशव थापाले एन आर एन संस्थागत रुपमा नै नेपाल भित्रका अन्य मौलिक चाड मनाउनको लागि पनि समन्वय गर्न तयार रहेको बताएका थिए।
आयोजकका अनुसार यस कार्यक्रमको समन्वय नेपाली राजदुतावास सौलले गर्नेछ भने नेपाली सम्पर्क समिति एनसिसीले सहजिकरणको भूमिका निर्वाह गर्नेछ। यसैगरी प्रादेशिक संस्था बागमति , लुम्बिनी प्रदेश र तराई मधेश सामज साथै अन्य जिल्लागत , साहित्यिक, राजनितिक संस्थाहरुको विशेष सहयोग रहने छ। हिजोसम्म आवद्ध हुन नसकेका संस्थाहरु यो हप्तासम्म छलफल गरि आवद्ध गरिने आयोजकले जनाएको छ।
वृहत दशैँ कार्यक्रममा नेपाली मौलिक परिकार, साँस्कृतिक झाँकि, पञ्चेबाजा आदि हुनेछन्। यसगरि कोरियामा रहेको जेष्ठ नेपाली नागरिकबाट टीका तथा प्रसाद ग्रहण गरिने तयारी रहेको छ। नेपाली सँस्कृतिको अलावा कोरियन संस्कृति झल्किने झाँकिहरु पनि प्रस्तुत हुने आयोजकले जनाएको छ।
वृहत दशैँ महोत्सवमा कोरियामा रहेका सम्पूर्ण नेपालीहरुलाई आफ्नो आफ्नो मौलिक पोसाकमा सजिएर उपस्थित जनाउनको लागि आयोजकले अनुरोध गरेको छ। विगत ७ वर्ष देखि लगातार दशैँ कार्यक्रमको आयोजना गर्दै आएको संस्था पाँच स एक सकृय संस्था हो। यो संस्थाले विभिन्न साँस्कृतिक कार्यक्रम, सामाजिक सेवा साथै आन्सानमा एकमात्र नेपाली पुस्तकालय सञ्चालन गर्दै आइरहेको छ।
