प्रवासी नेपाली मञ्च दक्षिण कोरियाको नयाँ नेतृत्वमा अन्जन कुलुङ राई
नेकपा एमाले प्रवास संगठन प्रवासी नेपाली मञ्च (ओएनएफ) दक्षिण कोरियाको नयाँ नेतृत्वमा अन्जन कुलुङ राई सर्वसम्मत निर्वाचित भएका छन। अक्टोबर ६ तारिख आइतबार सम्पन्न आठौँ राष्टृय महाधिवेशनले राईलाई अध्यक्षमा चयन गरेको हो। नेतृत्वका लागि धेरैको उमेद्वारी आएका कारण सहमति जुट्न धेरै समय लागेको थियो। 
अधिवेशनबाट राईको नेतृत्वमा १० सदस्यीय कार्यसमिति गठन गरिएको छ। समितिको उपाध्यक्षमा नवराज तिमिल्सिना, सचिवमा देवेन राई र उपसचिवमा मणिराम गौतमलाई जिम्मेवारी दिइएको छ भने सदस्यहरुमा दीप थापा मगर, महेश थापा, सन्दिप चोङवाङ, राजेन्द्र तामाङ, कुवेर थापा र जीवन पौडेल चयन भएका छन्।
ओएनएफ कोरियाको अध्यक्ष सिर्जना नेपालीको अध्यक्षता र नेकपा एमालेकी सचिव तथा पूर्वमन्त्री पद्माकुमारी अर्यालको प्रमुख आतिथ्य रहेको अधिवेशनमा एमाले केन्द्रीय सदस्य तथा प्रवासी नेपाली मञ्चका पूर्वएशिया र ओसियाना इञ्चार्ज डा. सूर्य पाठक र प्रवासी नेपाली मञ्च अन्तराष्ट्रिय कमिटीका अध्यक्ष सञ्जय थापा बिशेष अतिथिको रुपमा आमन्त्रण गरिएको थियो। 
सभालाई सम्बोधन गर्दै प्रमुख अतिथी अर्यालले आगामी २०८४ को चुनावमा नेकपा एमालेले बहुमत ल्याउने दाबि गरेकी थिइन्। साथै नेपाल विकास नहुनुमा अस्थिर सरकार र सामाजिक अराजकता नै मुख्य कारण रहेको औल्याउँदै नेपालीहरु धेरै नकारात्मकतामा रहेको प्रति चिन्ता व्यक्त गरिन्। यसैगरि नेपालले व्यवस्था परिवर्तनको लागि धेरै समय खर्च गरेको र अहिले निर्माणको चरणमा रहेकोले सबैले आ आफ्नो गाउं जिल्लाबाट विकासका लागि लागिपर्न पनि अनुरोध गरिन्।
कार्यक्रममा कोरियामा रहेका सकृय सामाजिक तथा राजनैतिक संस्थाका अध्यक्ष एवम प्रतिनिधिहरुको पनि उल्लेख्य उपस्थिति रेहेको थियो।
