स्याङ्जा एलादीमा हुने “चौथो वार्षिकोत्सव तथा शुक्रबारे मेला २०८१” को तयारी अन्तिम चरणमा
स्याङ्जा जिल्लाको वालिङ नगरपालिका वडा नं. ४ मा पर्ने एलादी गाउँमा “चौथो वार्षिकोत्सव तथा शुक्रबारे मेला २०८१” हुने भएको छ । “संयमित गतिशील र मानवप्रेमी युवाहरु लिई साथमा, सँस्कृति जगेर्ना र गाउँ विकासको नेतृत्व अब हाम्रो काँधमा” भन्ने मेलाको मूल नारा लिएर संगम युवा क्लबको आयोजना तथा स्थानीय आमा समूह र बाबा समूहको विशेष सक्रियतामा यही मंसिर ९ गतेदेखि १५ गतेसम्म ७ दिने सो मेला हुने भएको हो ।
ग्रामीण पर्यटनको प्रचुर सम्भावना बोकेको उक्त एलादी गाउँ र आसपासको क्षेत्रमा मेलाले गाउँको आर्थिक, सामाजिक पक्षमा मात्र नभई मौलिक तथा साँस्कृतिक संरक्षण र सम्बर्द्धनमा समेत टेवा पुर्याउने उद्धेश्यले सो मेला आयोजना गरिएको क्लबका अध्यक्ष मनिल गुरुङले बताए ।
उक्त ग्रामीण भेगमा उत्पादित ताजा र अर्गानिक तरकारी, सुन्तला, कफि एवम् अदुवा लगायतको खाध सामाग्रीको प्रदर्शन साथै विक्री वितरणको व्यवस्था गरिएको र मेला मार्फत प्रचारप्रसारको व्यवस्था मिलाईएको कार्यक्रम संयोजक दुर्गेश गुरुङले जानकारी गराए ।
मेलाको लागी आर्थिक सहयोग संकलन अभियान तीब्र रुपमा अगाडी बढ्दै प्रचारप्रसार, विभिन्न संघसंस्था, प्रशासन र सम्बन्धित निकायसँग समन्वय गर्दै तयारी अन्तिम चरणमा पुगेको आयोजकले जनाएको छ । स्थानीय मनोरञ्जनात्मक खेलकूद, सांस्कृतिक कार्यक्रम, स्थानीय नृत्य प्रस्तुति मेलाको मुख्य आकर्षण रहेको र साविक वडा स्तरीय पुरुष भलिबल प्रतियोगिता समेत आयोजना हुने भएकोले मेलाको थप रौनकता बढ्ने आयोजकले खेल संयोजक चेतन गुरुङ/सुजन गुरुङले जनाएको छ ।
सिद्धार्थ राजमार्गको पोखरा-बुटवल अन्तर्गत वालिङ नगरपालिकाको त्रियासी वा रामबाच्छाबाट खहरे, रत्ने हुँदै करिब ७ किलोमिटरको पक्की/कच्ची सडकपछि उक्त मेला स्थलमा पुग्न सकिने र मेला सभ्य र भव्य सम्पन्न गर्न आर्थिक, भौतिक सहयोगको अपेक्षा गर्दै “चौथो वार्षिकोत्सव तथा शुक्रबारे मेला २०८१” अवलोकनका लागी मेला मूल आयोजक समितिले सम्पूर्णमा अनुरोध गरेको छ ।
