दक्षिण कोरियामा “तमू ल्होसार २०८१” आउँदो जनवरी ५ मा मनाईने
दक्षिण कोरियामा रहेका तमू (गुरुङ) समुदायले मौलिक पर्व तथा नयाँ वर्ष “तमू ल्होसार २०८१” मनाउने भएको छ । तमू धीं दक्षिण कोरियाले सउल क्षेत्रमा आउँदो जनवरी ५ तारिक मनाउने मिति तय गर्दै विगतका वर्षहरुमा जस्तै आफ्नो मौलिक पहिचान, भाषा – भेषभूषा, संस्कार – सँस्कृति तथा परम्परालाई संरक्षण, सम्बर्द्धन र जगेर्ना गर्ने उद्धेश्यले तमू ल्होसार मनाउने भएको हो ।
संस्थाको प्रारम्भिक चरणको बैठकले तमूहरुको वर्ग चक्र अनुसार सप्ह्री ल्हो (सर्प वर्ग) लाई स्वागत र मुप्री ल्हो (चील वर्ग) विदाई गर्दै दिवाभोज, शुभकामना आदानप्रदान तथा विविध साँस्कृतिक कार्यक्रम आयोजना गर्ने तयारी भइरहेको संस्थाकी केन्द्रीय अध्यक्ष रुपा गुरुङले जानकारी दिनुभयो ।
सम्भवत: यसपटक पनि नेपालबाट चर्चित कलाकार आमन्त्रण गरी स्थानीय कलाकारहरुको बेजोड साँस्कृतिक प्रस्तुति समेत रहने गरी ल्होसारको तयारीमा जुटिरहेको संस्थाका साँस्कृतिक विभाग संयोजक रामचन्द्र गुरुङ (RC)गुरुङले जानकारी दिनुभयो । सुविधा सम्पन्न हलमा आयोजना हुने सो ल्होसार कार्यक्रममा तमू (गुरुङ) तथा नेपालीहरुको जमघटसँगै स्वादिष्ट नेपाली खानाको परिकारको व्यवस्था गरिने संस्थाका केन्द्रीय महासचिव वाईबि गुरुङले बताउनुभएको छ ।
तमू धीं दक्षिण कोरियाद्धारा आयोजना हुने उक्त “तमू ल्होसार २०८१” कार्यक्रमको सम्पूर्ण विवरण छिट्टै सार्वजनिक गरिने र उक्त दिन अन्य संघसंस्थाले कार्यक्रम नजुधाई दिनुहुन आयोजकले विशेष अनुरोध गरेको छ । कार्यक्रम सभ्य र भव्य सफल बनाउन कोरियामा रहेका सम्पूर्ण तमू, गैर तमू दाजुभाई तथा दिदीबहिनीहरु, नेपाली समुदाय तथा संघसंस्थाहरुलाई सहयोगको लागि आयोजकले हार्दिक अनुरोध गरेको छ ।
