कोरियाको बुसानमा पनि चासोक तङनाम मनाइयो

किरात याक्थुङ चुम्लुङ बुसान शाखाले लिम्बु समुदायको महान चाड “चासोक तङनाम” भव्यताका साथ मनाएको छ। चुम्लुङले डिसेम्बर २२ तारिख आइतबार 가야 대학교 किम्हेमा शुभकामना आदानप्रदान एवम साँस्कृतिक कार्यक्रम गरि मनाएको थियो। सेवा साबा श्री चेम्जोङले चासोक पूजा गरि विधिवत रुपमा कार्यक्रम सुरु गरेका थिए।

उक्त कार्यक्रममा हेमन्त गुरुङ, एरिक सम्बाहाम्फे, राज नेम्बाङ, सन्देश लिम्बूको गायन प्रस्तुती रहेको थियो। यसैगरि अन्य कलाकारहरु बिबेक निङ्लेखु, सुरेन लिम्बू, शान्ति लिम्बू, सुनिल बेघा, दिलुसा लिम्बू, बिमन्ता लिम्बूले पनि बेजोड प्रस्तुती पस्केका थिए। चुम्लुङको तर्फबाट केलाङ यसैगरि यायोक्खा बुसान टोलीको साकेला नृत्य पनि रहेको थियो। तङनाममा सांगीतिक मनोरञ्जनका साथ साथै लिम्बू मौलिक परिकारहरु पनि राखिएका थिए। बुसान चुम्लुङ अध्यक्ष प्रताप इधिङ्गोको अध्यक्षता र चुम्लुङ कोरिया केन्द्रका बरिष्ठ उपाध्यक्ष मनोज मादेम्बाको प्रमुख आतिथ्यमा सम्पन्न कार्यक्रमा विभिन्न संघ संस्थाका प्रतिनिधिहरुको उपस्थिति रहेको थियो।

हरेक वर्षको मंसिर पूर्णिमाको दिन मनाइने चासोकमा पाकेको नयाँ अन्नबाली सर्वप्रथम पितृहरुलाई चढाएर मात्र ग्रहण गर्ने परम्परा रहिआएको छ। चुम्लुङ बुसान शाखाले गतवर्ष गायक साइल लिम्बूको साथमा चासोक मनाइएको थियो।