आफन्त नै ओसार्छन बालबालिका
सुर्खेत-गाउँको जानेबुझेको केटो, पटकपटक काठमाडौं गइरहन्थ्यो। राष्ट्रवादी एकता पार्टीको केन्द्रीय सदस्य, त्यत्तिमात्र होइन नातामा आफ्नै भतिज। परिवारभित्रकै भतिजप्रति उनले अविश्वास गर्ने कुरै भएन।
छोराहरूलाई काठमाडौं लगेर निःशुल्क पढाइ दिन्छु भनेपछि धैनकोट-९ मुगुका भीमबहादुर मल्लले पनि आँखा चिम्लेरै दुई छोरालाई भतिज धनमानसिंह मल्लको जिम्मा लगाए।गाउँमा सबैले नेता स्वीकारेका, बाठोटाठो र पढेलेखेका धनमानसिंहले काठमाडौंमा लगेर राम्रो शिक्षा दिने र ठूलो मान्छे बनाइदिने आश्वासन दिएपछि गाउँलेहरू पनि हौसिए।
विकट गाउँमा अभावसँगै रुमल्लिएका सन्तानले राजधानीमा पढ्न पाउने लोभमा गाउँलेहरूले छोराछोरीलाई धनमानसिंहको जिम्मा लगाइदिए। त्यत्तिमात्र होइन, काठमाडौंमा पढ्न पाउने भएपछि अभिभावकहरू आफ्ना छोराछोरीलाई पुर्याउन बाजुरासम्म पुगे। तर जब ती बालबालिकासहित धनमानसिंह सुर्खेतमा पक्राउ परे त्यसपछि मात्र धैनकोट मुगुका अभिभावक छाँगाबाट खसेजस्तै भए।
धनमानसिंहले पढाउन नभई अवैध कार्यमा लगाउन बालबालिका ओसार्न लागेको जानकारी उनीहरूले प्रहरीबाट पाए। सुर्खेत प्रहरीले काठमाडौं लैजाँदै गरेको अवस्थामा सुर्खेतको छ्रिन्चुबाट मुगुका ११ जना बालबालिकालाई उद्धार गरेपछि यसबारे रहस्य खुलेको हो।
अन्नपूर्ण दैनिकको समाचार अनुसार उद्धार गरिएका बालबालिकालाई जिल्ला बालकल्याण समिति सुर्खेतले अभिभावकको जिम्मा लगाएको छ। आफन्तले नै आफ्ना सन्तानलाई अवैध कार्यका लागि लैजान लागेको जानकारी प्रहरीबाट पाएपछि अभिभावकहरू पनि छक्क परे।
छोराछोरी लिन सुर्खेत आइपुगेका धैनकोटका भीमबहादुरले भने, ‘मेरा चार सन्तान छन्। दुई छोराले निःशुल्क पढ्न पाउने भए। दुई छोरालाई आफैं घरमा पढाइ हाल्छु भन्ने सोचेर भतिजको जिम्मा लगाएको थिएँ। बेच्न पो लगेको रहेछ।’
आफ्नै दाइको छोराले यस्तो गर्ला भन्ने उनले सोचेका पनि थिएनन्। उनी भन्छन्, ‘हामीबाट गल्ती भयो, अब कहिल्यै पनि छोराछोरीलाई अर्काको जिम्मा लगाएर पठाउने छैनौं।’ उद्धार गरिएका सबै बालबालिका १२ वर्षभन्दा मुनिका छन्।
