कोरियामा अबैधानिक नेपाली कामदार घटाइने
रीतु थेबे
काठमाडौं- दक्षिण कोरियामा रहेका अवैध नेपाली कामदार घटाउन कोरिया र नेपाल सहमत भएका छन् । वैदेशिक रोजगार विभागका महानिर्देशक भरतराज सुवेदीले कोरियामा रहेका अवैध नेपाली कामदार घटाउन कोरियालाई सक्दो सहयोग गर्ने बताए ।
कोरियामै रहेका कामदारले नेपालीलाई राम्रो काममा लगाइदिने प्रलोभन देखाउने, धर्म परिवर्तन गराउने लगायतका कारणले नेपाली कामदार अवैध रुपमा बस्ने गरेको उनले बताए । भूकम्प पीडितका लागि कोरियाको विदेशी कामदार सहयोग केन्द्रले संकलन गरेको राहत रकम हस्तान्तरण कार्यक्रममा बोल्दै महानिर्देशक सुवेदीले नेपाली कामदारलाई निर्माण क्षेत्र, सुरक्षा गार्डमा पनि रोजगारीको अवसर दिन आग्रह गरे |
त्यस्तै कृषि तथा पशुपालन क्षेत्रमा कोटा बढाइदिन पनि उनले आग्रह गरे । कोरियाको मागका आधारमा नेपालले कामदार पठाउन सक्ने बताए | एचआरडी कोरियाका उपाध्यक्ष कि फ्यङ हीले कोरियामा नेपाली कामदार अवैधानिक हुने क्रम बढेकोमा चिन्ता व्यक्त गरे । नेपाली कामदार इमान्दार, लगनशिल भएकाले रोजगारीको अवसर बढ्न सक्ने उनको भनाइ थियो |
भूकम्प पीडितलाई साढे तीन लाख सहयोग
भूकम्प पीडितका लागि दक्षिण कोरियाको विदेशी कामदार सहयोग केन्द्रले प्रधानमन्त्री राहत तथा उद्धार कोषमा झण्डै साढे तीन लाख रुपैयाँ जम्मा गरेको छ । केन्द्रले संकलन गरेको तीन हजार तीन सय डलर एचआरडी कोरियाका उपाध्यक्ष कि फ्यङ हीले वैदेशिक रोजगार विभागका महानिर्देशक भरतराज सुवेदीलाई शनिबार हस्तान्तरण गरेका हुन् ।
यसअघि एचआरडी कोरियाले १० हजार डलर कोषमा जम्मा गरेको थियो । एचआरडीले राहतका लागि भन्दै भाषा परीक्षामा सहभागी हुनेलाई ५२ हजार वटा साइनपेन पनि बाँडेको छ ।
