विश्व क्रिकेट लिग च्यापियनसिपमा नेपाल पपुवान्युगिनीसित पराजित
सोल – आइसीसी विश्व क्रिकेट लिग च्याम्पियनसिपअन्तर्गत् आफ्नो तेस्रो खेलमा नेपाल पपुवा न्यूगिनीसँग २ विकेटले पराजित भएको छ ।सोमबार युएईको आबुधाबीमा नेपालले दिएको २ सय ३३ रनको विजयी लक्ष्य पपुवा न्यूगिनीले निर्धारित ५० ओभरमा ३ बल बाँकी छँदा ८ विकेट गुमाउँदै पूरा गर्यो ।पपुवा न्युगिनीका लागि असद भालाले सर्वाधिक ८७ रन जोड्दै टोलीलाई जित दिलाए ।
नेपालका लागि पारस खड्का र मेहबुब आलमले समान २ तथा सोमपााल कामी, शक्ति गौचन र सागर पुनले समन १–१ विकेट लिएपनि त्यो जितका लागि प्रयाप्त भएन ।
खेलमा यसअघि टस जितेर पहिले ब्याटिङ रोजेको नेपलले निर्धारित ५० ओभरमा ८ विकेट गुमाउँदै २ सय ३२ रन जोडेको थियो । खेलको पहिलो बलमै अनिल मण्डल गुमाएको नेपालले मात्र २९ रन हुँदा दोस्रो विकेटको रुपमा सागर पुन गुमाएको थियो । २३ बल खेलेका सागरले मात्र १० रन जोड्न सके ।
त्यसपछि ब्याटिङ गर्न आएका ज्ञानेन्द्र मल्लले ओपनर सुवास खकुरेलसँग मिलेर ५० रनको साझेदारी गर्दै टोलीलाई उकास्न खोजेपनि २६ बलमा २३ रन जोड्दै मल्ल आउट भएपछि नेपाल पुनः दबाबमा परेको थियो । थप १० रन जोड्दा कप्तान पारस खड्का पनि १६ बल खेल्दै व्यक्तिगत ६ रनमा आउट भएपछि नेपाली इनिङ धरासायी बनेको थियो ।
तर, त्यसपछि ब्याटिङ गर्न आएका शरद भेषवाकरले ८२ बलमा ७८ रन बनाउँदै नेपाललाई सम्मानजनक योगफलसम्म पु¥याएका थिए । ओपनर सुवास खकुरेलले १ सय ४ बलमा ६३ रन बनाउँदै नेपालको इनिङ सम्हाले | यस्तै, बसन्त रेग्मीले नटआउट २४ रन प्रहार गर्दा सोमपाल कामीले ८ तथा मेहबुब आलमले ३ रन जोडे ।
जारी प्रतियोगितामा तेस्रो पराजय बेहोरेको नेपाल अंकविहीन हुँदै अंकतालिकाका पुछारमा छ । प्रतियोगिता अन्तर्गत् नेपालले स्कटल्यान्डविरुद्धको दुबै खेलमा पराजय भोगेको थियो ।
काठमाडौंमा हुनुपर्ने पपुवा न्यूगिनीविरुद्धको खेल नेपालको कमजोर व्यवस्थापन र भूकम्पपछिको अवस्थाले युएईमा सारिएको हो । नेपाल र पपुवा न्यूगिनीले बुधबार दोस्रो खेल खेल्नेछन् ।
आइसीसीले एक दिवसीय ढाँचामा खेलाउने यो प्रतियोगितामा टेस्ट नखेल्ने ८ राष्ट्र सहभागी छन् ।
