भूकम्प र अग्नी पीडितलाई सहयोग गर्न कन्सर्ट
फोनिज कोरिया संवाददाता
सोल-यो बर्षको बैशख १२ गते नेपालको लागि कालो दिन बन्यो । यसै दिन आएको विनाशकारी भूकम्पले हजारौं नेपालीको ज्यान गयो भने लाखौं घरबार बिहिन भएका छन् । कसैको घर भत्किएको छ भने कसैको परिवारमा धनजन क्षति भएको छ । त्यस्ता भूकम्प पिडितलाई सहयोग बिदेशी दातृ निकायले मात्र होइन संसारमा छरिएर रहेका नेपालीहरुले पनि होस्टेमा हैसे मिलाएका छन् । कोरियामा रहेका नेपालीहरुले पनि आ–आफ्नो गच्छे अनुसार सहयोग गरेका छन् । यहि क्रमममा सेभ नेपाल फुटवल फाउण्डेशनले सहयोग जुटाउनकै लागि कोरियामा सांगीतिक कन्सर्ट आयोजना गर्न लागेको छ ।
बुद्ध जयन्तीको अवसरमा पारेर मे २४ मा आयोजना गर्न लागिएको कन्सर्ट तताउन गायक एन्ड्रीन प्रधानले नेतृत्व गरेको १९७४ एडी ब्याण्डले लाइभ प्रस्तुति दिने छ । त्यस्तै गायिका इन्दिरा जोशी, नेपाली तारा प्रताप लामा, नृत्यकार परिना राईले पनि साथ दिने छन् । कार्यक्रम संचालन गर्न भने पूर्ब मिस नेपाल सदीक्षा श्रेष्ठ आउनेछिन । सोलस्थित छाम्सिल जिम्न्यास्टिक हलमा हुने कन्सर्टबाट उठेको रकम ताप्लेजुङ फूङलीङ बजारमा आगलागी पिडितलाई पनि सहयोग गरिने फाउन्डेसनका अध्यक्ष आङ तेण्डी शेर्पाले बताए । गत चैतमा भएको आगलागीबाट चार दर्जनभन्दा बढी घर जलेर नस्ट भएका थिए भने आगलागीबाट ९० परिवार विस्थापित भएका थिए ।
‘हामी नेपाली’ नाम दिइएको कन्सर्ट आयोजना गर्नुको अर्को कारण रहेको पनि अध्यक्ष शेर्पाले खुलाए । कोरियाली समाजमा अझै शान्तिका दूत भगवान गौतम बुद्धको जन्मस्थलबारे भ्रम रहेको छ । यो भ्रम कोरियनहरु र सारा विश्वभर चिर्न यो कन्सर्टको आयोजना गर्न लागिएको उनको भनाइ थियो । यसका लागि ‘बुद्ध वाज बोर्न इन नेपाल’ लेखिएको ब्यानर, पर्चा र टि सर्ट व्यवस्था गरिएको छ ।
बिदेशमा रहेर पनि स्वदेशमा केहि गर्न सकिने भएकाले कन्सर्ट गर्न लागिएको अध्यक्ष शेर्पाले बताए । ‘हाम्रो सानो प्रयास भूकम्प र अग्नी पिडीतलाई महत्वपूर्ण राहत बन्न पनि सक्छ । ’ उनले थपे ‘यो प्रयासमा सामेल हुन कोरियामा रहेका सबै नेपालीलाई अनुरोध गर्दछु ।’
