समर नाईटमा जमेका बाबु साईला र विवशको ‘टेम्पर’
फोनिज संवाददाता,सोल-शनिबार सुवनस्थित माउन्ट एभरेष्ट रेष्ट्रोरेण्टमा समर नाईटमा बाबु साईला र यल्जी विवश रात छिप्पिदैं जांदा साहित्यको प्यालामा सोजु हालेर मेक्छुमा जम्दैं थिए । हेर्दा के बोल्लान् र जस्तो लाग्ने कलाकार बाबु साईला कविताको छिडीबाट छिरेपछि भेउ पाउदैंन्न मज्जाले डुबछन् गहिराईमा चुर्लुम्म ।
बिश्वास कविताबाट शुरु भएको बाबु साईलाको कविता विश्वास गर्न गाह्रो हुने गरी आफनी आमालाई यसरी संझन्छन् ।
खै किन हो अचेल
घरपारिको मनासलु हिमाल
आरुबखडा नासपाती र सुन्तलाका फुलहरु
अनि मेरो आमाको फुलेको कपाल
उस्तै उस्तै लाग्छ…
चरीले बास बस्न छाडेपछिको गुंड
मैले पाइला टेक्न बिर्सिएपछि
झोक्राएर ढल्न थालेको गाउंको घर
घरछेउको बुढो लांकुरीको बोट
अनि आमाको खुम्चिएको निधार
उस्तै उस्तै लाग्छ….
समसामयिक,चोटिला केही गजल र कविता प्रस्तुत गरेका थिए बाबु साईलाले ।
अतिथि कविको रुपमा उपस्थित भएका कवि यल्जी विवश अहिलेका युवापिडीले प्रयोग गर्ने स्लांग शब्दको मिसावटमा प्रयोगवादी कविता टेम्पर सुनाउदैं थिए ।
किन यहाँ ढुङ्गाहरु मात्र हिँड्छन्
ढुङ्गाकै बारीमा ढुङ्गा नै रोप्न ?
उनी कवितामा विम्ब र प्रतिकलाई बढी प्रयोग गर्ने खुबी राख्छन् ।आधा दर्जन बढी कविता गजल पस्केका युवा चर्चित कविले रात,भरिया,भट्टी शिर्षकका कविता वाचन गरे ।
जनजाति महासंघका अध्यक्ष चित्र बहादुर मोक्तानको प्रमुख आतिथ्यमा सम्पन्न सो कार्यक्रममा अनलाईन वेभ टिभिका संस्थापक क्यामेरामेन उमेश घिमिरेलाई श्रव्य दृष्य र म्यूजिक भिडियो छायांकनमा निरन्तरता दिई कला क्षेत्रमा योगदान दिएकोमा सम्मान गरिएको थियो ।
कलाकारहरुको संगठन नेपाल ललितकला मञ्च कोरिया शाखाले सो सम्मान गरेको हो । विशेष अतिथि उमेश घिमिरे,संघीय समाजवादीका देवराज स्यांगतेन रहेका थिए ।त्यसैंगरी अतिथिमा युवा कवि यल्जी विवश,मोडल जसु याख्खा लगायत विभिन्न संघसंस्थाका पदाधिकारीहरु रहेका थिए ।
स्थानीय कलाकारको मनग्गे जमघट रहेको समर नाईटमा अमन थिंग,अमन तामांग,ज्ञानु चौंहान,निरन गुरुंग,संजीत थापा मगर,सुनिल थापा,आशिक बोहराले गीत गाएर कार्यक्रमको शोभा बढाएका थिए । बाबु साईलाका शुभचिन्तकहरुको उल्लेख्य भीड रहेको सो कार्यक्रमको अनलाईन वेभ टिभिको फेसबुक पेजबाट प्रत्यक्ष प्रसारण गरिएको थियो ।
त्यसैंगरी ललितकला मञ्च दक्षिण कोरियाका स्थापनाकाल देखि निरन्तर सहयोग पुराएकोमा निरन गुरुंग,संजीत थापा र विर्ख गुरुंगलाई सम्मान गरिएको थियो ।
अनलाईन वेभ टिभिका प्रस्तोता द्धय उमेश शेरालुंग र मेघप्रसाद बाईबाले कार्यक्रम सञ्चालन गरेका थिए । छन्देरी ग्रुपको आयोजनामा यस अघि पनि कलाकार बाबु साईला छन्देरीमा एकल कविता वाचन गरेका थिए ।
