एनआरएनए पोर्चुगलका उपाध्यक्षद्धारा पत्रकारलाई धम्की

फोनिज सम्बाददाता
एनआरएनए पोर्चुगलका उपाध्यक्ष सुनिल संगमले  नेपालका न्युज २४ च्यानलका युरोप प्रतिनिधी गणेश पाण्डेलाई ज्यान मार्ने धम्की दिएका छन् । स्थानिय समय अनुसार बुधबार राती १२ बजे तिर पाण्डेको क्याफेमा गई धम्की दिएको लण्डनबाट खेमराज रानाभाटले उल्लेख गरेक  छन् ।

एनआरएनए पोर्चुगलको आर्थिक हिनामिनाको समाचार लेखेको विषयलाई लिएर उपाध्यक्ष संगमले धम्की थिएका थिए । समाचारको खण्डन गर्नुको साटो मादक सेवनको नशामा हुल बाँधी रात विरात काम गर्ने ठाउँमै गई ज्यान मार्ने धम्की दिने यस्ता उदण्ड पदाधिकारीलाई निलम्बन  गर्न पोर्चुगलबासीलाई अनुरोध पनि गरिएको छ ।

स्मरण रहोस एनआरएनए पोर्चुगलको यो कार्य समितिले गत अगस्टमा कार्यभार समाल्दा अघिल्लो समितिबाट बुझेको करिब २२ हजार युरो र समितिले नेपाली राजदुतावास फ्रान्सबाट पासपोर्ट बनाउन समन्वय गरे बापत उठाएको सेवा शुल्क समितिको खातामा नराखी पदाधिकारीहरुबाट मनोमानी ढंगबाट उपयोग गर्दै आएको कुरा समिति भित्रैका सदस्यहरुबाट बाहिर आएको थियो ।

नेपाली राजदुतावास फ्रान्सबाट पोर्चुगलबासी नेपालीले पासपोर्ट बनाउन एनआरएनए पोर्चुगलले समन्वय गरे बापत २६ देखि ३६ युरो सेवा शुल्क लिने गर्थ्यो, जुन कार्यमा अनियमितता भएको आशंका गरी अहिले अख्तियार दुरुपयोग अनुसन्धान आयोगले छानविन गर्दैछ ।

एनआरएनए पोर्चुगलको यो समितिले आफ्नो हिसाब कितावको बारेमा सार्वजनिक रुपमा कुरा उठेपछि तुरुन्त सार्वजनिक गर्नुको साट्टो साधारणसभा र महाधिवेशन बाहेक अरु बेला देखाउन जरुरी छैन भन्दै टार्दै आएको छ ।

समितिको कोष हिनामिना भएको कुरा बाहिर आएपछि हिसाबकिताव पारदर्शी रुपमा राख्न, व्यवस्थापन गर्न र सबैका सामु एक महिनाभित्र सार्वजनिक गर्न भनि कोषाध्यक्षको संयोजकत्वमा पाँच सदस्यीय एक समिति बनाइएको थियो ।
तर उक्त समितिको अहिलेसम्म विधिवत रुपमा एक पटक पनि बैठक बसेको छैन भन्ने कुरा उक्त समितिकै सदस्यबाट बाहिर आएको छ ।
स्रोत नेपाल जापान डट कम